KM Aprova Pagamentu Estraordináriu Ba Setór Públiku

0
267
Sekretáriu Estadu Konsellu Ministru no Komunikasaun Sosiál, Matias Boavida, bainhira halo konferénsia imprensa iha Palásiu Governu, ohin. Foto António Goncalves

DILI (TATOLI)-Sétimu Governu Konstitusionál aprova ona pagamentu estraordináriu ne’ebé koñese hanesan saláriu fulan 13 nian ba setór públiku sira.

Sekretáriu Estadu Konsellu Ministru no Komunikasaun Sosiál, Matias Boavida, hatete pagamentu ba saláriu fulan 13 ne’e prevee dezde iha tinan 2017 no Governu la aumenta no diminui ba orsamentu ne’ebé mak iha atu selu setór públiku tomak.

“Ami la ko’alia montante hira maibé dekretu lei ne’e atu aprova de’it katak Governu ida ne’e prevee atubele selu saláriu báziku ba funsionáriu iha setór públiku”, Matias dehan iha Palásiu Governu hafoin reuniaun Konsellu Ministru nian, horisehik.

Aleinde ne’e aprova mós pagamentu suplementár liuliu ba funsionáriu públiku sira ne’ebé halo serbisu estraordináriu.

“Durante períodu atu taka anu fiskál ne’e, ita iha diferensa tempu ida ho Timór no Kanadá entaun ita tenke obriga funsionáriu sira serbisu kalan boot, balun to’o tuku 2 ka 3 madrugada tanba ita-nia loron lahanesan entaun Konsellu Ministru hanoin ba serbisu estraordináriu ne’e Governu tenke konsidera traballu sira ne’e”.

Dokumentu sobre pagamentu estraordináriu no suplementár ne’e aprezenta husi Ministériu Planu no Finansa oinsá Governu haree ba situasaun ne’ebé iha no aprova hotu ona.

Nune’e mós ko’alia kona-ba atribuisaun ba adjudikasaun kontratu projetu konstrusaun edifísiu foun PNTL nian ne’ebé Komisaun Nasionál Aprovizionamentu aprezenta no Konsellu Ministru aprova atu bá oin hodi bele hala’o prosesu projetu nian.

“Konsellu Ministru mós konsege análiza projetu sira seluk liuliu Ministru iha Prezidénsia Konsellu Ministru aprezenta projetu rezolusaun Governu atu ko’alia kona-ba rejimentu internu Konsellu Ministru nian ne’ebé ita tenke atualiza tanba ho situasaun ne’ebé mak Sétimu Governu Konstitusionál atu hala’o ninia knaar”.

Razaun sira ne’e Governu haree tanba kontestu sira ohin loron obriga atubele hadi’ak liután serbisu Konsellu Ministru nian.

 Reuniaun ne’e mós ko’alia sobre rejime aprovizionamentu ne’ebé Primeiru-Ministru rasik tau hela iha meza Konsellu Ministru nian atu hothotu bele analiza dokumentu ne’e para bá oin bele servisu iha sistema aprovizionamentu ida ne’ebé di’ak.

 “Ita iha lei kona-ba aprovizionamentu mas ita presiza mós sistem ida atu servisu di’ak entaun dokumentu ne’e iha prosesu análize no ikus mai ita sei diskute kle’an liután kona-ba ida ne’e”.

Matias mós relata katak eis Prezidente Repúblika, Taur Matan Ruak no atuál Francisco Guterres ‘Lú Olo’ halo veto ba Konsellu Kombatente Libertasaun Nasionál ba dala rua entaun Governu agora tau iha konsiderasaun másimu no aas tebes oinsá atubele haree lalais liubá ida ne’e.

“Nune’e ita bele iha Konsellu ida ne’ebé bele trata veteranu sira-nia serbisu”.

 Ikus liu mak Ministru Prezidénsia Konsellu Ministru, Adriano do Nascimento, hato’o ba membru hotu atu nia informa informasaun sira ne’ebé mai husi Parlamentu Nasionál ba elenku governante tomak.

“Ne’e atu hatudu katak Governu iha preokupasaun tebes oinsá atubele iha komunikasaun di’ak entre Governu ho Parlamentu rasik, nune’e ita bele hetan solusaun ne’ebé diálogu entre órgaun soberanu sira”.

(Jornalista: Maria Auxiliadora)

(Editór : Manuel Pinto)

HUSIK IDA HATÁN