KJFL Hakarak Bolu Joven Hotu Oinsá Bele Kria Serbisu Ba Aan Rasik

0
40
Joven sira partisipa iha Semináriu Dezenvolvimentu Abilidade Profisionál ne’ebé hala’o husi Engineers Without Borders iha Salaun Konferénsia Knua Juventude Fila-Liman, Pateo - Dili. Foto/KJFL.

DILI, (TATOLI) – Knua Juventude Fila-Liman (KJFL) tau prioridade aas ba pilár importante rua mak oportunidade ba foinsa’e no lian foinsa’e sira atu kria rasik sira-nia empregu tanba ohin loron  joven barak mak buka serbisu maibé atu kria rasik serbisu susar tebes.

Nune’e ezisténsia KJFL hakarak bolu no ko’alia ho joven hotu atubele halo saida mak sira bele nomós akompaña hodi hetan susesu.

Project Manager KJFL, Anderias Tani, hatete dalaruma joven sira iha ideia negósiu maibé lahatene atu bá ne’ebé entaun KJFL hanesan fatin ida ne’ebé atu fasilita no fó oportunidade hodi kria serbisu ba aan rasik.

KJFL ne’ebé foin inaugura husi eis Primeiru-Ministru, Rui Maria de Araújo, iha agostu 2017 lori espesialista lubun ida tuir ezizénsia joven nia atubele hatene demanda merkadu kona-ba saida mak merkadu presiza, abilidade saida mak joven sira iha atu nune’e merkadu traballu bele foti sira.

Dezde harii knua ne’e iha ona joven hamutuk 200 resin ne’ebé tuir ona atividade treinamentu ne’ebé oferese gratuita ba sé de’it mak hakarak partisipa no halo konsultasaun bainhira joven sira iha ideia inovativu atu hala’o negósiu ruma nomós bele pasa tempu atu halo peskiza ruma iha fatin ne’ebé fó okaziaun hodi halo diskusaun.

“Espera sira bele hetan benefísiu husi ne’e. Bainhira joven ida iha ideia, ita halo nia planu dezenvolvimentu negósiu, planu ida ne’e mak ikus mai sei lori nia bá rejistu iha SERVE, kuandu rejistu hotu nia dehan laiha osan entaun ita liga nia ba BNCTL atu halo kréditu no knua nia papél akompaña durante fulan neen.  Sé nia iha jestaun ladi’ak ita sei liga bá espesialista, sé nia hakarak treinamentu negósiu ita liga ba IADE to’o joven ne’e atu loke nia negósiu”, Anderias hatete iha edifísiu KJFL, Rua D Fernando, Páteo, ohin.

Nune’e liuhusi apoiu KJFL nian iha ona ema na’in-ualu ne’ebé pozitivu ona atu hala’o atividade komérsiu iha bee-moos nian iha fulan oin no sei atende kursu no prátika iha tinan oin.

“Karik iha tinan oin hanesan ne’e ita sei haree bee galon ida bolu bee Lafaek ne’ebé sei halo kompetisaun ho Wemori no Gota. Ida ne’e mak rezultadu husi doadór sira-nia hakarak ne’ebé fasilita liuhusi knua juventude”.

Anderias haktuir KJFL ne’e iha parseiru lubuk ida hanesan IADE, BNCTL, SERVE, Telemor, Engineers without Borders, Sekretáriu Estadu Juventude no Traballu ne’ebé kada loron tersa atende joven sira hodi halo konsultasaun no diálogu informál iha knua nia fatin atu joven sira bele iha eskolla atu halo saida hodi nune’e mosu ideia foun atubele halo buat ruma.

KJFL ne’e eziste liuhusi partrosina UNDP Timor-Leste no iha esperansa ba futuru bele sai hanesan entidade públiku ida. Vizaun KJFL mak juventude iha Timor-Leste hetan kbiit, partisipa no hetan serbisu ba moris di’ak.

Jornalista: Maria Auxiliadora

Editora: Rita Almeida

HUSIK IDA HATÁN