KFF Komemora 12 Novembru Ho Kuda Ai-Parapa

0
49
Viveiru Ai-Parapa. Foto/KFF.

DILI, (TATOLI) – Konservasaun Flora no Fauna (KFF) hanesan organizasaun ida ne’ebé hamriik hodi tau importánsia ba kestaun ambientál liuliu iha zona kosteira, komemora 12 novembru ne’ebé Governu ratifika hanesan Loron Nasionál Juventude liuhusi asaun konkreta ho kuda Ai-Parapa.

Diretór Ezekutivu KFF, Agostinho Soares de Araújo, hatete loron istóriku, Masakre Santa Krús ne’ebé akontese iha 1991, importante ba joven timoroan tanba foinsa’e sira uluk sakrifika-aan ba mate hodi dignifika Timor-Leste nia independénsia, nune’e KFF iha hanoin hodi kontribui iha loron importante mak ho atividade kuda Ai-Parapa hamutuk 700 iha zona kosteira Metinaru ho tema “Ai-Hun Ida ba Timoroan Tomak”.

“Nu’udar joven kontinuadór ita-nia kontribuisaun no partisipasaun mak saida? Ita presiza hatudu asaun konkreta ruma, tanba ne’e Konservasaun Flora no Fauna nia atividade reflorestasaun ne’ebé ohin halo ne’e reprezenta mós joven hotu katak ita tenke fó ita-nia onra, agradese ba sira”, Agostinho dehan iha Metinaru via telemovel, ohin, bainhira hala’o hela serbisu planta Ai-Parapa.

Agostinho hato’o mós ba joven hotu tenke halo reflesaun no koopera liuhusi mekanizmu saida bele halo atu kontribui ba loron asua’in nian ida ne’e.

Maski laiha apoiu ka doadór ruma ne’ebé tulun organizasaun ne’e maibé ho espíritu volutarizmu no esforsu husu apoiu individuál ba ema sira e’ebé interese ba problema ambientál liga ba reflorestasaun ho kapasidade ne’ebé iha.

“Hetan kontribuisaun uitoan husi maluk lubun ida, ita-nia kolega ONG (Organizasaun Naun Govermentál) sira para ita realiza atividade ne’e”.

Konservasaun ida ne’e kuda ona Ai-Parapa hamutuk rihun haat dezde iha inísiu atividade iha Autoridade Munisipál Dili liuliu iha Hera no Metinaru no Munisípiu Likisá mak Ulumera.

“Ai-Parapa ida ne’e ai-horis ida ne’ebé sensitivu uitoan no presiza kuidadu, ho ita-nia pasiénsia tomak mak tempu ida sei fó nia rezultadu. KFF kuda ona iha munisípiu rua ne’e, iha balun moris no mate. Sira ne’ebé mate ami esforsu troka filafali, ita espera katak tempu ida nia sei hatudu progresu”.

Partisipasaun iha atividade KFF nian iha loron 10 novembru 2017 mak Vise-Ministru Dezenvolvimentu ba Abitasaun, Ordenamentu no Ambiente, Abrão Gabriel Santos Oliveira, Deputadu husi Parlamentu Nasionál, Autoridade Lokál husi Postu Administrativu Metinaru. 

Jornalista: Maria Auxiliadora

Editora: Rita Almeida

HUSIK IDA HATÁN