Kaptura Tiagu, PJR-TL Tenke Fó Mandatu Kapturasaun ba Interpol

0
161
Dionísio Babo Soares. Foto/António Gonçalves.

DILI (TATOLI)—Eis Ministru Justisa Timor-Leste, Dionísio Babo Soares sujere katak, Prokuradór jerál Repúblika (PJR) Timor-Leste tenke fó mandatu kapturasaun ba Interpol kona bá kazu Tiagu Guerra (Portuguesa) ho nia fen.

“Ha’u hanoin mandadu kapturasaun la’ós ba Australia de’it maibé tenke haruka mós ba Interpol tanba sira seidauk halai to’o Portugal,” Dionísio Babo ba Ajénsia Tatoli iha Parlamentu Nasionál, ohin.

Dionísio dehan, atu lori hikas arguidu Tiagu Guerra ho nia fen Chang Fong Guerra ka Tammy Guerra depende ba Prokuradoria Jerál Repúblika Timor-Leste ho Prokuradoria Jerál Northen Territory Australia.

“Sira Nain rua (Arguidu sira) hetan hela detensaun iha Austrália, enkuantu atu fila ne’e depende ba komunikasaun ne’ebé prokuradoria Jerál Timor-Leste ho Prokuradoria Jerál Northen Territory Australia nian,” Babo esplika.

Hodi hatutan, Prokuradór Jerál Repúblika, Jose Ximenes haruka ona karta mandadu kapturasaun maibé hein katak komunikasaun governu Austrália bele fó resposta di’ak mai Timor.

“Sé kuandu arguidu Nain rua to’o ona iha Portugal signifika ita labele kaer ona tanba sira sidadaun Portugal nian. Normalmente ema mai hosi rai seluk tama ilegál iha ita nia rai, entaun ita deporta kedan fila tanba sira tama ilegalmente enkuantu kazu ida ne’e mós hanesan.”

Dionísio husu atu halo investigasaun hodi haree kazu pasaporte tanba arguidu Nain rua ne’e nia estatutu TIR (Termu Identidade Rezidénsia) maibé sira bele iha fali pasaporte ida tan enkuantu pasaporte orijinál iha hela Tribunál.

Arguidu Tiagu Guerra ho nia fen Chang Fong Guerra halai tanba deskonfia embaixada Portugal Fasilita Pasaporte ba Arguidu sira hodi sira nain rua halai hosi Dili sa’e ró ki’ik ida iha suku Betanu, munisípiu Manufahi no bainhira to’o iha Darwin, Austrália, polísia Austrália ka’er kedas sira, tanba tama ba teritóriu Austrália ho illegalmente. Sira nain rua to’o iha Darwin iha loron kinta, 9 Novembru 2017.

Arguidu nain rua ne’e komete kazu iha Timor-Leste ho numiro prosesu ba kazu brankeamentu kapitais rejistadu iha Prokuradór Distritál Dili ho mak Númeru Unidade Crime (NUC 0511/14.PDDIL) no hetan ona kondenasaun iha primeira instánsia iha Agostu 2017, maibé sira sei rekorre (halo rekursu) ba Tribunal Rekursu.

Iha desizaun primeira instánsia kondena sira tinan 8 tama prizaun iha Agostu liubá, maibé depois sira halo rekursu ba Tribunal Rekursu, maibé antes ne’e arguidu na’in rua ne’e tama ona iha prizaun preventiva, maibé depois sira halo pedidu rekorre ba Tribunal Rekursu no Tribunal Rekursu altera tiha medida koasaun ne’e tau ba iha provizaun de auzénsia (bandu atu labele sai hosi territóriu Timor – Leste) nian, ho konsekuénsia mós prende sira nia pasaporte.

Basa desizaun koletivu Tribunál Distritál Dili hatún pena tinan ualu (8) tama prizaun ba Tiago Guerra no nia-kaben Tammy Guerra, inklui selu indenizasaun ba Estadu ho valór $859.000.

Bazeia ba akuzasaun Ministériu Públiku ba arguidu Tiago Guerra no Tammy Guerra ho krime tolu, ida mak, bazeia ba artigu 295 kona-ba krime pekulatu, artigu 303 kona-ba krime falsifikasaun dokumentu no artigu 313 (a), (b) no (c) kona-ba krime Brankeamentu kapitál hosi Kódigu Penál. Maibé ikus mai desizaun Tribunál primeira instánsia absolve tiha krime rua seluk hodi kondena de’it ho krime pekulatu.

(Jornalista : Zezito Silva)

(Editór : Manuel Pinto)

HUSIK IDA HATÁN