Investimentu Estranjeiru Depende Situasaun Polítika

0
49
Oscar Lima hasoru Prezidente Repúblika, Francisco Guterres Lú Olo, ohin iha Palásiu Prezidente Nicolau Lobato Bairo Pite. Foto dokumentasaun mídia PR

DILI, (TATOLI) – Prezidente Kámara Komérsiu Indústria Timor-Leste (CCITL-sigla-portugés), Oscar Lima, hateten investór sira rai liur hakarak investe maibé depende ba situasaun polítika no seguransa rai laran nian.

“Investimentu hosi nasaun seluk mai Timor-Leste depende ba situasaun polítika rai laran, tanba ema investe la’os fasíl no sira sei investe mós osan barak”, hateten Oscar Lima liuhosi Konferénsia Imprensa iha nia edifísiu Akait, ohin.

Primeiru-Ministru, Marí Alkatiri ba Perth Austrália aprezenta beleza Nasaun no área potensivél sira atu dada investidór sira mai investe.

“Esklaresimentu hosi Primeiru-Ministru, Marí Alkatiri iha ámbitu enkontru entre emprezáriu sira iha ne’eba (Perth) aprezenta kapas tebes no investidór sira hakarak mai Timor-Leste, enkuantu ami hasoru malu ho Alexandrinha ema riku tebes iha Macau hakarak mai investe ho osan 10 miloen dolar iha rai ida ne’e”, haktuir.

Maibé fila fali ba situasaun polítika, “Ha’u mós laran la hakmatek, ita konvida ona antes entaun sira mai halo levantamentu mak sira haree tanba sira hakarak investe duni iha ne’e”.

Investór sira balun hakarak investe iha área turizmu, agrikultura no semente. Entaun sira nia prezensa bele fó servisu ba joven sira.

Kuandu situasaun polítika ne’e di’ak, tuir nia ema barak mak hakarak investe duni mai iha ne’e.

Kuandu investór internasionál tama mai presiza asegura sira nia polítika iha kontestu lisensa no oinsá ho birokrasia ba finansiamentu kréditu

Enkuantu, CCITL mós ba Xina hodi hasoru governu Xina atu mai halo investimentu no sira dehan mai iha dezembru eh janeiru atu halo levantamentu oinsá mak mai investe.

Sikun seluk, dekanu hosi Fakuldade Ekonomia no Jestaun iha Universidade Nasionál Timor Lorosa’e (UNTL), Fernando Baptista Nuno, akresenta investidór sira rai liur mai investe importante atu asegura ekonomia rai laran iha setór hotu, maibé kondisaun infraestrutura no seguransa nasionál presiza garante sustentalibilidade.

“Sira mai tenke haree kondisaun Timor-Leste hanesan estrada di’ak ona ka la’e, ponte di’ak ona ka la’e, eletrisidade funsiona di’ak ou la’e no seguransa nasionál estavél ou la’e hafoin sira bele investe”.

Jornalista: Zezito Silva

Editora: Rita Almeida

HUSIK IDA HATÁN