Investidór Sanulu-Resin Sei Vizita RAEOA

0
84
Diretór Ezekutivu TradeInvest Timor-Leste, Arcanjo da Silva. Foto/TradeInvest.

DILI (TATOLI)- Diretór Ezekutivu TradeInvest Timor-Leste, Arcanjo da Silva, informa TrandeInvest Timor-Leste sei lori investidór potensiál  hamutuk sanulu resin ona ne’ebé hakarak vizita Rejiaun Administrativa Espesiál Oekusi Ambeno (RAEOA) hodi haree poténsia iha rai-ketan ne’e.

“Ami aluga aviaun bainrua (loron 16 novembru) lori investidór potensiál ne’ebé hakarak bá, la’ós ema hotu bá tanba aviaun nia kapasidade limitadu, to’o iha ne’ebá ita mak fasilita lori sira bá fatin agrikultura, irrigasaun no otél sira para bele haree saida mak bele halo”, Arcanjo hatete iha Timor Plaza, ohin.

Tanba investidór sira mak iha kapitál, hafoin vizita mak sira bele hatene saida mak bele halo tanba iha RAEOA iha poténsia ba peska, agrikultura no turizmu ne’ebé di’ak tebes.

“Infraesturura iha ne’ebá di’ak liu tanba iha aeroportu internasionál, iha portu di’ak tebes, ró Haksolok sei mai, eletrisidade di’ak liu iha ne’ebá, bee-moos sira sei halo hotu, fasilidade mak ida ne’e, hein de’it investidór mai ho nia osan atu investe tanba infraestrutura bázika ita dezenvolve”.

Arcanjo espera bainhira investidór sira ne’e vizita hotu sei bá TradeInvest hodi hatama sira-nia proposta atu bele fasilita sira investe iha Oekusi.

“Ami bele ajuda sira lori bá Ambiente, Komérsiu, SERVE, Imigrasaun para hetan vistu traballu, ami mak fasilita hotu. Sé la’e sira dehan labele, di’ak liu ami bá Indonézia, Vietname, Myanmar”.

TradeInvest mós iha planu atu lori investidór sira iha tinan tuirmai atu bá fali iha setór seluk tanba nasaun ne’e tenke hetan hotu benefísiu.

(Jornalista : Maria Auxiliadora)

(Editór : Manuel Pinto)

HUSIK IDA HATÁN