Inspira Espíritu 12 Novembru Atu Lori Povu Moris Di’ak

0
107
Presidente Comité 12 de Novembro, Gregório Saldanha

DILI (TATOLI)—Responsavel Komité 12 November Gregóriu da Cunha Saldanha husu ba dirijenté nasaun RDTL nian tomak atu inspira espíritu 12 Novembru nia hodi lori povu ba moris di’ak.  

“Ita tenke inspiradu hosi hahalok no determinasaun joven sira nian ne’ebé hatudu tiha ona iha loron 12 Novembru 1991 atu lori povu ba moris di’ak hanesan ita hotu promete iha tempu ukun rasik an,” Gregóriu Saldanha afirma iha nia diskursu ba komemorasaun masakre santa cruz, iha semitériu santa cruz, Domingo (12/11).

Nia dehan momentu ida ne’e atu rekorda tinan 26 liu ba, juventude sira hamriik, hakuak malu, la haree ba kór polítiku, rasa no relijiaun hodi hatudu ba mundu katak Timor hakarak ukun rasik an, tanba ne’e sakrifísiu boot ne’ebé juventude sira hatudu tenke sai inspirasaun ida ba situasaun ohin loron.

Deferénsia idea ne’ebé ohin loron iha nu’udar parte ida hosi konsekuénsia valor demokrasia, maibé lá signifika ignora komunikasaun hodi hamriik iha bandeira unidade nasionál nia mahon hanesan buat ne’ebé juventude loriku asuwa’in hatudu iha tinan hirak liu ba.

Tan ne’e, nia husu ba populasaun timoroan tomak atu hakmatek hodi garante estabilidade seguransa iha Timor-Leste, nune’e fó biban ba ulun boot sira atu buka malu halo dialog hodi hetan solusaun ruma ba situasaun polítika ohin loron nian.

“Husu Povu hakmatek fó konfiansa tomak ba ulun boot sira hodi buka solusaun ba ita nia rain,” Gregóriu Saldanha husu.

(Ekipa Redasaun)

HUSIK IDA HATÁN