Independénsia Tinan 17, La Iha Razaun Fila ba Kotuk

0
411
Primeiru Ministru, Marí Alkatiri bainhira halo konferénsia Imprensa hafoin serimonia tomada pose iha Palásiu Prezidensiál. Foto António Goncalves

COVALIMA (TATOLI)-Ministru Adjuntu Primeiru-ministru, José Reis dehan katak Timor-Leste (TL) hetan ona independénsia tinan 17, la iha razaun atu ita fila ba kotuk, tanba ne´e pás no estabilidade importante ba ita no ita tenke garante nafatin.

“Importante liu mak ita tenke hakmatek kontribui ba pás. Mantein pás, ita bele asegura buat ne´ebé ita harii tinan 17. Ita labele sobu fila fali saida mak ita harii ona, ita harii mak pás no estabilidade,” Ministru José Reis hateten perante administradór no funsionáriu públiku sira iha salaun administrasaun Munisípiu Kovalima, iha fim-de-semana ne´e.

Nia hatutan, ita kuaze hakat liu 2006 ho situasaun ida ne´ebé halo ita la´o ba tiha ba kotuk maibé ita hotu-hotu kontribui hahú 2007 mai oin atu harii pàs no estabilidade. “Tanba saida mak tenke fila fali ba kotuk? la iha razaun,” reforsa ministru José Reis.

Kontribui ba pás no estabilidade ne´e ita hotu-hotu nia responsabilidade la´ós PNTL (Polísia Nasionál Timor-Leste) no Falintil-FDTL (Forsa Defeza Timor-Leste) mesak. Povu tomak kontribui ba pás no estabilidade.

“Ne´ebé, importante liu iha vontade polítika atu bele hametin pás no estabilidade. Kuandu ita la iha vontade atu hametin pás no estabilidade, ne´e problema,” dehan ministru adjuntu primeiru-ministru, José Reis.

Tanba ne´e, nia husu nafatin atu populasaun sira iha baze atu kontinua kontribui ba hametin pàs no estabilidade. Kestaun iha leten as vezes iha interpretasaun oi-oin, maibé fiar katak lider sira iha leten la hanoin atu estraga rai ida ne´e.

“Kestaun, vizaun polítika as vezes ida nian ida, ida seluk nian ida. Ita hein katak situasaun ne´e la´o ho di´ak. Se governu ida monu, governu ida mai fila fali ne´e normál,” realsa ministru adjuntu primeiru-ministru ne´e.

Nia hatutan, la normál iha situasaun ida ne´e mak ita-nia instituisaun hanesan administrasaun públika seidauk hamriik metin, seidauk forte. Depois, ita bele hateten katak dezenvolvimentu ekonómiku no sosiál iha ita-nia rain ne´e depende liu ba “torneira” ida de´it. “Ida ne´e mak bele kria problema barak,” subliña governante ne´e.

Nia halo komparasaun polítika ho rai seluk katak governu ida tuun eh sa´e, buat hotu la´o normál, maibé halo komparasaun estabilidade ekonómika, ema nian metin ona. Governu seidauk forma mós funsionáriu la´o ninian maibé ita nian la forma “posibilidade” funsionáriu la´o ninian, administrasaun públika la funsiona. Osan la iha komplikadu liutan.

“Ida ne´e mak problema iha ita-nia rain,” nia subliña tan hodi halo komparasaun polítika no estabilidade ekonómika iha ita-nia rain ho rai li´ur sira hanesan Japaun, España, Itália, Portugal nomós seluk tan.

Entretantu, nia mós sita primeiru-ministru, Marí Alkatiri nia afirmasaun katak problema mak iha polítiku sira la´ós situasaun polítika. Situasaun Polítika la´o normál.

“Ha´u hanoin haree husi parte pozitivu, di´ak tebes. Ita atu hatene liután lala´ok demokrasia ne´e hanusa? ita buka dekor liután artigu sira iha konstituisaun. Ne’e pozitivu, maibé importante liu mak ita tenke hakmatek kontribui ba pás,” nia reforsa tan.

 (Jornalista: Rafy Belo)

(Editor : Manuel Pinto)

HUSIK IDA HATÁN