Iha Loron Independénsia, Sei Promove Produtu Lokál

0
80
Komisaun Organizadora ba Komemorasaun Loron Proklamasaun Independénsia TL hala´o enkontru ho Prezidente Repúblika, Francisco Guterres Lú Olo, kona-ba progresu prepartóriu hodi komemora loron importante refere. Imajen Mídia Palásiu PR.

DILI (TATOLI)—Komemorasaun Proklamasaun Loron Independénsia Timor-Leste (TL) ne´ebé sei hala´o iha Munisípiu Kovalima, 28 Novembru tinan ne´e, sei harame ho feira ne´ebé organiza hosi timoroan sira.

Feira ida ne´e, ho objetivu atu promove produtu lokál hanesan tais, hahán (fehuk midar, ai farina, kumbili, batar, no talas) no produtu sira seluk ne´ebé prodúz hosi matéria lokál liu-liu akadiru, kulit animál no rotan.

Aleinde ne´e, atividade sira ne’ebé Komisaun Organizadora hala’o tiha ona maka kompetisaun desportiva sira hanesan desportu tradisionais (kuda halai taru) inklui karreta no motór halai taru.

Atividade hirak ne´e, segunda horisehik iha Palásiu Prezidente Nicolau Lobato, Bairru-Pité, Dili, Prezidente Komisaun Organizadora ba Komemorasaun Loron Proklamasaun Independénsia, atuál Ministru Administrasaun Estatál, Valentim Ximenes ho nia ekipa informa ona progresu preparasaun ba Prezidente Repúblika, Francisco Guterres Lú Olo.

“Ami mai hasoru señor Prezidente Repúblika atu atualiza kona-ba atividade Preparatóriu ba loron Proklamasaun Independénsia 28 Novembru iha Suai no munisípiu sira hotu iha Timor en-jerál,” Valentim haktuir ba jornalista sira iha Palásiu Prezidente Nicolau Lobato.

Iha komemorasaun ne’e rasik sei partisipa hosi Prezidente Repúblika, Primeiru Ministru inklui konvidadu internasionál ne’ebé hela Timor-Leste nomós autoridade nasionál no lokál.

Iha 27 Novembru, Prezidente Repúblika sei hala’o entrevista eskluzivu ho RTTL-ep hodi informa ba públiku kona-ba importánsia loron 28 Novembru no dezenvolvimentu nasionál.

(Jornalista: Xisto Freitas)

(Editór : Manuel Pinto)

HUSIK IDA HATÁN