“Ha’u Taridu” Bainhira KRDTL Interpreta Tuir Ajenda Partidu

0
1471
Xefe Estadu Lú Olo hato'o ninia deskursu iha Segundu Kongresu Komité 12 Novembru ne'ebé hala'o iha CCD, tersa ne'e. Imajen Ajénsia TATOLI/António Gonçalves.

DILI (TATOLI)—Prezidente Repúblika, Dr. Francisco Guterres Lú Olo sente laran taridu bainhira ema balun interpreta Konstituisaun RDTL tuir ajenda partidu polítiku ida-idak nian. Ida ne’e bele hamosu risku atu haree liu-liu ba interese partidu nian duké ba interese nasionál.

Lú Olo hato’o informasaun ne’e liuhusi ninia diskursu bainhira loke Kongresu Komité 12 Novembru ba daruak ho tema “Hamutuk Ita Luta ba Moris Di’ak”, ne’ebé hala’o iha Centro Convenção Dili (CCD), Tersa (7/11).

Nia dehan, molok nia foti desizaun polítika kona-ba formasaun Governu, nia lee no interpreta didi’ak artigu sira ne’ebé kait malu iha Konstituisaun RDTL kona-ba formasaun Governu.

“Iha sistema demokrátiku hanesan ita nian, ita bele iha Governu maioria no minoria. Foin dala ida ne’e maka ita hasoru situasaun harii Governu ho minoria ba tinan lima. Maibé, Governu minoria bele funsiona no bele ukun ho di’ak sé iha vontade atu kontribui hosi parte hotu-hotu,” nia esklarese.

Tuir Xefe Estadu katak problema boot liu la’ós Governu maioria ka minoria, opozisaun forte ka fraku, maibé importante liu maka ita iha relasaun ba malu atu tane ás interese nasionál.

“Bainhira ita ko’alia kona-ba interese nasionál, ita haree uluk liu-ba iha programa dezenvolvimentu ba tinan lima no Orsamentu Jerál Estadu atu implementa planu asaun ba tinan ida-idak. Signifika, ita tenke tau ita-nia matenek hamutuk atu tulun no hala’o programa dezenvolvimentu hodi hadi’a ba beibeik povu ninia moris, ita hotu nia moris ba ohin loron no aban bainrua,” Lú Olo informa.

Iha biban ne’e, Prezidente Repúblika mós hateten Komité 12 Novembru hala’o Segundu Kongresu iha momentu ida ne’ebé mosu rumor oi-oin, nakonu ho lia bosok, ho intensaun atu hata’uk ema, halakon fiar ba malu no hafahe timoroan sira.

“Ha’u fiar katak alin sira sei haree durante kongresu ida ne’e oinsá organiza an iha ita nia ukun án ida ne’e, oinsá hasa’e ás no hatutan espíritu sakrifísiu hosi sira ne’ebé husik hela ran no ruin naklekar iha Timor-Leste tomak,” nia esplika.

Tuir relatóriu Komité 12 Novembru nian ba II Kongresu, Xefe Estadu hateten, sobrevivente Masakre 12 Novembru la’ós de’it rejista no verifika dadus sobrevivente, identifika no rekolla ruin nomós fó apoiu ba vítima sira nia família, maibé kolabora hamutuk ho Governu RDTL, sosiedade sivíl sira, instituisaun internasionál, mídia, igreja, universidade no partisipa mós iha atividadade desportiva. Nune’e, Komité 12 kontribui ona hodi haforsa dezenvolvimentu rai ida ne’e nian.

“Ha’u fiar katak hakarak ida ne’e sei la husik monu espíritu sakrifísiu matebian sira nian ba rai ida ne’e. Hamutuk ita bele haburas rai ida ne’e atu hadi’a ba beibeik povu tomak ninia moris ohin loron no aban bainrua,” Lú Olo haklaken.

(Jornalista: Xisto Freitas)

(Editór : Manuel Pinto)

HUSIK IDA HATÁN