Gracia Orgullu Bele Sai Prezidente Repúblika

0
124
Gracia Antónia Guterres. Imajen Mídia Palásiu PR.
Gracia Antónia Guterres simu Konstituisaun hosi Prezidente Repúblika, Francisco Guterres Lú Olo hodi hala´o nia kna´ar durante oras ida nia laran. Imajen Mídia Palásiu PR.
Gracia Antónia Guterres simu Konstituisaun hosi Prezidente Repúblika, Francisco Guterres Lú Olo hodi hala´o nia kna´ar durante oras ida nia laran. Imajen Mídia Palásiu PR.

DILI (TATOLI)—Gracia Antónia Guterres sai Prezidente Repúblika durante oras ida nia laran nu’udar parte hosi inisiativa globál “Labarik Asumi Kna´ar” ne’ebé hala’o iha nasaun 130.

Sai Prezidente Repúblika durante loron ida iha Palásiu Prezidenti Nicolau Lobato, Bairru Pité, Dili, segunda lorokraik ohin, nu´udar jestu ida hodi komemora Aniversáriu Adopsaun Konvensaun Direitu Labarik no mobilizasaun hosi Loron Mundiál ba labarik sira.

Prezidente Repúblika Francisco Guterres Lú Olo entrega kna´ar simbolikamente ba Gracia Antónia Guterres hodi sai ‘Prezidente Repúblika’. Nia  (Gracia) hala’o kna´ar hanesan Prezidente Repúblika akompañadu ofisiálmente hosi seguransa pesoál no batedores hosi nia rezidénsia to’o Palásiu Prezidente Nicalau Lobato ne’ebé simu hosi Xefe Kaza Sivíl Interina, Ana Pessoa no Adjuntu Xefe Kaza Militár, Superintendente Antónia de Sá iha portaun entrada to’o nia gabinete. Hafoin tama iha nia gabinete, Gracia Antónia Guterres diriji enkontru ho Xefe Kaza Sivíl no Adjuntu Xefe Kaza Militár.

Gracia Antónia Guterres dadalia ho Prezidente Repúblika, Francisco Guterres Lú Olo. Imajen Mídia Palásiu PR.

Gracia Antónia Guterres hato’o nia sentimentu orgullu relasiona ho inisiativa Labarik Asumi Kna´ar nu’udar ‘Prezidente Repúblika’ ba oras ida.

“Ha’u sente orgullu bainhira Prezidente entrega ita-nia nasaun nia konstituisaun ba ha’u-nia liman no hatuur ha’u iha nia kadeira nu’udar parte hosi eventu labarik maka assume kna´ar. Ne’e maka reflesaun ida hosi nia kompromisu ba labarik sira,” nia haktuir.

Nu’udar reprezentante hosi labarik sira hotu iha Timor-Leste, Gracia informa, nia  diskute ona kestaun sira ne’ebé labarik hasoru hanesan asesu limitadu ba pré eskolár, taxa abandona eskola ne’ebé ás, mal nutrisaun no violénsia hasoru labarik maka problema boot ne’ebé hasoru.

“Prezidente rona didi’ak no diskute ona opsaun balun ho ha’u atu rezolve problema hirak ne’e. Ha’u espera katak nia sei haree ba kestaun hirak ne’e,” nia tenik.

Hafoin ko’alia ba mídia, Korpu Seguransa Pesoál no batedores akompaña Gracia Antónia Guterres hodi lori hikas fila ba nia rezidénsia iha Audian.

Iha biban ne´e, Prezidente Repúblika, Francisco Guterres Lú Olo deklara katak nia apoiu tomak inisiativa ne’e hodi apela ba líder mundiál no ema hotu-hotu iha nasaun ne’e atu garante saúde, edukasaun no fó protesaun ba labarik hotu. (Jornalista: Xisto Freitas)

 

HUSIK IDA HATÁN