Governu Sei Submete OR Ba PN Iha Kinta Feira

0
605
Primeiru Ministru, Marí Alkatiri. Foto GPM

DILI (TATOLI)—Primeiru Ministru, Sétimu Governu Konstitusionál, Mari Alkatiri, deklara, iha loron Kinta (09/11) Governu sei submete ba Parlamentu Nasionál (PN) Orsamentu Retifikativu (OR).

“Povu Doben ! Loron, 9, Novembru, governu sei haruka ba PN Orsamentu Retifikativu ba Orsamentu Jerál do Estadu (OJE) 2017,” Primeiru Ministru Mari Alkatiri deklara liuhosi nia facebook iha loron, 5 Novembru, tuku 23:27 oras Timor-Leste.

Xefe do governu ne’e espera katak, Parlamentu Nasionál sei bele halo apresiasaun no aprova.

Antes ne’e Ministru Prezidénsia Konsellu Ministru, Adriano do Nascimento, informa governu sei aprezenta programa ho orsamentu retifikativu dala ida de’it ba Parlamentu Nasionál (PN) hafoin deputadu sira halo ajendamentu ba diskusaun.

“Programa governu no orsamentu retifikativu bele aprezenta dala ida maibé diskusaun mak keta-ketak, ne’e depende PN atu halo ajendamentu”, dehan nia.

Nia haktuir, orsamentu retifikativu halo reajustamentu ba orsamentu 2017 ne’ebé PN uluk aprova ona, razaun ajustamentu atu responde nesesidade urjénsia ne’ebé la-prevee orsamentu iha PN.

Ezemplu, ai moruk laiha ona, moras aumenta tan, halo transferénsia pasiente sira ne’ebé moras grave atu ba rai li’ur, atu selu tusan iha ospitál rai li’ur no selu ba implementasaun projetu ne’ebé durante ne’e la’o.

Preokupasaun hirak ne’e mak governu halo reajustamentu ba orsamentu retifikativu atu bele responde nesesidade urjénsia.

Iha parte seluk mós Diretór Jerál Finansa Estadu, Ministériu Planu no Finansa, Januario da Gama, informa iha sirkulár ne’e estipula ka determina orientasaun, prosedimentu no prosesu sira ne’ebé bele gia ministériu sira atubele prepara OR.

Aprezenta mós kalendáriu ba preparasaun tékniku no to’o bainhira mak parte Governu bele aprezenta iha Parlamentu Nasionál.

Kona-ba kalendáriu OR nian, hahú serbisu iha loron 31 Outubru 2017 hodi aprezenta sirkulár ba KM no to’o loron 17 Novembru, téknikamente tenke konklui ona para aprezenta fali ba KM hodi deside bainhira mak aprezenta iha PN.

Entretantu aumenta ba kontas públika hosi 1,34 sa’e ba 1,66 mill milhões dolar amerikanu. Hosi númeru ne’e kuaze 320 mill milhões mak inklui ona 211 milhões hodi selu dívida.

(Ekipa Redasaun)

 

HUSIK IDA HATÁN