Governu Sei Kontaktu KI ba Publikasaun TABR

0
397
Sekretáriu Estadu Konsellu Ministru no Komunikasaun Sosiál, Matias Boavida, bainhira halo konferénsia imprensa iha Palásiu Governu, ohin. Foto António Goncalves

DILI, (TATOLI) – Relasiona ho publikasaun The Australian Business Reviuw (TABR), parte governu liuhosi Sekretáriu Estadu Konsellu Ministru no Komunikasaun Sosiál (SEKM no KomSos) sei komunika Konsellu Imprensa (KI) Timor-Leste hodi halo kontaktu ho KI Austrália.

“Ita nia hanoin karik liu-hosi aprosimasaun konsellu imprensa ita nia no bele kontaktu ho konsellu imprensa Austrália nia, nune’e bele apelu ba mídia The Australian Business Review”, katak Matias Boavida ba jornalista sira liuhosi konferénsia imprensa iha Palásiu Governu, ohin.

Dalan liuhosi KI, tuir nia, jornalista ne’ebé hakerek notísia viola ona kódiku étika. Konsidera mós katak, publikasaun ne’e provoka situasaun rai laran, tanba ne’e husu ba timoroan hotu atu iha sentidu Estadu ne’ebé mak a’as.

Nia afirma, mesmu timoroan ida-idak ho ninia partidu maibé, labele monu iha armadilla (lasu) ne’ebé mak ema seluk kria hela.

“Ita iha situasaun difísil hanesan ne’e dala wain ema aproveita situasaun sira ba interesse ema seluk nia, tanba ne’e governu hanoin katak notísia ne’ebé jornal The Australian Business Review fó sai la loos no kompletamente kontráriu ho pozisaun Xefe Governu, ne’ebé fó tomak konfiansa no apoiu ba maun boot Xanana Gusmão nu’udar negosiadór másimu ba fronteira marítima nian”, katak

Nune’e mós reprejentante husi Gabinete Primeiru-Ministru (GPM), Alex Tilman, hatutan notísia ne’ebé hakerek husi jornalista Paul Garvey ho titlu “Sunrise hopes rise as talks begin” iha jornal TABR, edisaun 6 novembru, sai husi konteksu diskursu Xefe Ezekutivu.

“Ita hatene katak, ita hamutuk fó apoiu tomak ba ita nia negosiadór prinsipál maun boot Xanana Gusmão ho nia ekipa ne’ebé agora halo negosiasaun ho Austrália no ita hotu hamutuk ba ita nia defesa fronteira marítima tuir lei internasionél”, katak.

Hodi dehan tan, ita sei la susesu enkuantu hamosu konfuzaun no duvida iha ita nia leet no hatudu katak ita nia lideransa la unidu.

“Ita hotu hamutuk iha ita nia defesa, katak dezenvolvimentu ba rekursu greater sunrise tenke halo iha ita nia área, tanba ne’e mak ita halo dezenvolvimentu iha Suai no Be-Asu, halo koridór atu liga pontu rua ne’e no gasta osan barak atu prepara fatin hodi prosesa mina iha Greater Sunrise, negosiasaun la’ós fasil, tanba ita tenke buka atu rekursu sira dada rekursu mai ita nia rai”, tenik tan.

Nia informa, ekipa GPM prepara hela atu halo protestu ba jornal The Australian Business Review hodi klarifika notísia ne’ebé mídia ne’e fó sai.

Jornalista: Julia Chatarina

Editora: Rita Almeida

 

HUSIK IDA HATÁN