Governu Propoin OR Atu Selu ‘Tusan’

0
97
Ministru Prezidensia Konsellu Ministru, Adriano do Nascimento bainhira ko'alia ho jornalista sira iha Palásiu Nobre Lahane, ohin. Foto Egas Cristovão

DILI (TATOLI) – Ministru Prezidénsia Konsellu Ministru, Adriano Nascimento esplika Orsamentu Ratifikativu (OR) ne’ebé VII governu aprezenta ba meza Parlamentu Nasionál (PN) la’ós  atu finansia programa governu atuál nian, maibé selu de’it tusan governu anterior nian.

“Orsamentu ne’ebé governu propoin mai Parlamentu Nasionál la’ós  atu finansia programa governu nian, maibé atu finansia programa governu anterior ne’ebé balun la prevee orsamentu, balun Parlamentu Nasionál aprova ona iha Orsamentu Jerál Estadu (OJE) maibé la to’o ona no ida seluk mak dívida,” Adriano do Nascimento  tenik ba jornalista sira hafoin partisipa diskusaun pedidu karakter urjénsia ba Orsamentu Ratifikativu (OR) iha plenária PN, horisehik.

Maski nune’e, nia dehan, kompeténsia PN nian atu vota kontra maibé OR ne’e urjente tanba atu responde nesesidade urjente. Ema moras lubuk ida ne’ebé ospitál iha nasaun seluk lakohi simu tanba sidauk selu dívida. Projetu ne’ebé emprezáriu sira halo ita tenke selu tuir nia persentajen tenke selu antes atu taka tinan finanseiru. sosa buat sira ne’ebé governu la prevee hanesan transformadór eletrisidade ninian ne’ebé la prevee iha orsamentu nune’e mós orsamentu PNTL ne’ebé la to’o ona ho mós saláriu ba professor sira ne’ebé eskalaun sa’e ona.

Ho razaun hirak ne’e mak Tuir Adriano bainhira PN la aprova sei fó impaktu boot ba asunto sira ne’ebé mensiona.

“Opozisaun sira lakohi aprova Orsamentu ratifikativu, nia impaktu mak deve sira ninia multa sei sa’e ba beibeik, emprezáriu sira ne’ebé halo ona obra sei iha multa hotu, transformadór eletrisidade sei ita la prevee osan bainhira buat ruma akontese ita labele halo buat ida,” nia tetu konsekuénsia.

“Depende deputadu sira nia sensibilidade polítika no sosiál hodi hare kestaun povu nian no sensibilidade atu hare, sé kuandu sira uza maioria 35 votu atu vota kontra, demokrasia mak hanesan ne’e.” Adriano hakotu lia.

(Jornalista: Julia Chatarina)

(Editór : Manuel Pinto)

HUSIK IDA HATÁN