GMPTL Selebra Tinan ho Reflesaun

0
96
Foto Espesial

DILI, (TATOLI) – Prezidente ba Grupu Feto Parlamentár (GMPTL-sigla portugés), Brigida Correia, informa sei komemorasaun tinan 10 GMPTL ho reflesaun kona-ba servisu ne’ebé halo durante ne’e.

“GMPTL halo selebrasaun ba tinan 10 hodi halo reflesaun no hatudu ba públiku katak durante servisu GMPTL mak hanesan halo lei hirak balun”, hatutan Brigida Coreira ba jornalista sira iha Parlamentu Nasionál (PN), ohin.

Lei hirak ne’ebé GMPTL halo tanba kolaborasaun ho deputadu mane sira liliu lei ne’ebé liga ba igualdade jéneru, diskriminasaun feto ho mane, labarik ho ema kbiit la’ek.

“Esforsu hirak ne’ebé ami halo mak esbosu lei ne’ebé ami prepara liuhosi GMPTL, ami lori ba PN oinsá mak ami bele koordena deputadu sira hodi bele konsiente katak lei ne’e sei fó implikasaun ba feto iha Timor-Leste”, dehan tan.

GMPTL agradese ba mane sira tanba kuandu la iha apoiu hosi maluk deputadu sira iha PN ne’ebé liga ba violénsia doméstika, lei rai ne’ebé fó porsaun ba feto hodi hetan riku soin família nian, lei podér lokál maske Prezidente Repúblika sei veta hela no seluk tan.

GMPTL ne’e mai hosi deputadu sira ho partidu la hanesan no desizaun polítika oioin, maibé deputada ne’e hatete sempre buka hodi agrupa atu bele fó ideia hamutuk atu haree igualdade feto, emansipasaun feto, vulneravél.

Enkuantu, GMPTL iha IV lejislatura, lei balun ne’ebé pendente hela mak lei kazamentu no oinsá mak bele fó prioridade hodi dignifika feto tanba kultura Timor-Leste dalaruma mós fó presaun ba feto.

Entretantu, GMPTL harii iha 2006 liuhosi rezolusaun PN atu oinsá bele integra iha rede feto parlamentár komunidade nasaun ne’ebé ko’alia lian portugés.

“Kuandu ita la halo rezolusaun ida susar tebes atu tuir reuniuan deputada rede CPLP nian. Ezisténsia GMPTL importante atu defende igualdade jéneru iha PN no sai porta vóz povu nian, liliu ba feto sira iha PN”, tenik deputada bankada CNRT ne’e.

Jornalista: Zezito Silva

Editora: Rita Almeida

HUSIK IDA HATÁN