iklan

EKONOMIA

Garuda Sei Hatama Dokumentu Ba SERVE Iha Tempu Badak

Garuda Sei Hatama Dokumentu Ba SERVE Iha Tempu Badak

Garuda Indonesia. Foto/Google.

DILI, (TATOLI) – Delegasaun kompañia aéreu, Garuda Indonesia, ofisalmente hasoru ona Servisu Rejistrasaun no Verifikasaun Emprezariál (SERVE) oinsá atu rejistu hodi sai entidade ida iha Timor-Leste no tempu badak sei submete dokumentu ba SERVE hodi hetan lisensa.

Diretór Ezekutivu SERVE, Florêncio Sanches, hatete Prezidente Aviasaun Sivíl Timor-Leste mós kontaktu ona ho parte SERVE oinsá atu prosesa dokumentu husi empreza ne’e.

“Garuda prepara hotu ona dokumentu parese sei iha ida rua mak falta, maibé sira kumpri katak sei la semo kuandu seidauk rejista. Dezde sira hatama hotu dokumentu tuir kritéria ne’ebé lei husu SERVE sei fasilita halo iha loron ida nia laran. Dokumentu ne’ebé ita husu mak iha tiha ona SERVE bele hasai ona sertidaun sertifikadu atubele semo tuir rute ne’ebé ita iha”, Florêncio dehan iha Matadouru, kinta, (30/11).

Florêncio hatutan reprezentante empreza ne’e daudaun iha ona Dili no hein katak semana oin sira bele hatama dokumentu no SERVE bele organiza atubele emite sertifikadu para bele semo.

“Tanba Governu nia planu klaru katak ita tenke matein pozisaun atu fasilita sira. Kuandu nia hatama SERVE sei hasai númeru prosesu”.

Antes ne’e kompañia hatama ona kópia husi sira-nia dokumentu maibé tuir lei tenke entrega dokumentu orijinál nune’e seidauk bele, maibé sira hatudu ona vontade atu hala’o atividade iha país ida ne’e.

Diretór Jerál PT. Angkasa Pura Kupang, Kokoh Ritonga liuhusi konferénsia imprensa ne’ebé Tatoli asesu hatete ekipa tékniku Garuda iha ona Timor-Leste atu prepara voo entre Kupan-Dili .

Aleinde ne’e iha mós instrutór Garuda nian ne’ebé iha ona Dili hodi realiza teinamentu no prepara ba lansamentu nian.

Jornalista: Maria Auxiliadora

Editora: Rita Almeida

iklan
iklan

Leave a Reply

iklan
error: Content is protected !!