FMSS Sei Refleta 12 Novembru ho Sasin Moris Masakre

0
69

DILI, (TATOLI) – Fakuldade Medisina Siénsia no Saúde (FMSS) ne’ebé hamahan-án iha Universidade Nasionál Timor Lorosa’e (UNTL) sei komemora loron masakre Santa Kruz 12 novembru 1991 ho semináriu nu’udar aktu ida hodi dignifika no valoriza eroi, saudozu no mártir sira 12 novembru nian.

Prezidente Ezekutivu Asosiasaun Akadémiku-FMSS, Adão do Carmo de Jesus, informa ba ajénsia Tatoli ohin katak sei konvida sasin eh mate restu no autór moris 12 novembru nian balun hodi fahe koñesimentu no haktuir istória ba estudante sira hodi refleta.

Mate restu 12 novembru mak koordenadór Suku Motael, Januário de Jesus “Dadur”, koordenadór Bekora, Sergio Filomeno Marquês “Amali” nia estatua iha igreja Motael, Dili, nia oin no vise-prezidente 12 novembru 1991, Rogério Castro.

Tuir ajenda ne’ebé mak iha, atividade ne’e, estudante no estrutura fakuldade inklui universidade sei realiza aban, sesta, (10/11) iha kampus Lahane Orientál, Dili, tuku 08.00 to’o remata.

Entretantu, komemorasaun tinan ne’e, hahú sábadu (30/9), AAE-FMSS, UNTL realiza ona torneiu volleyball, baskete no futeból salaun (Futsal) hodi hadau taxa rotativa périodu daruak nian ho objetivu hametin liutan dame, domin no respeitu, hodi valoriza espiritu aas wa’in masakre 12 novembru 1991 no hametin lasu amizade entre estudante sira iha fakuldade.

Nune’e mós, dekanu FMSS, João Martins, akresenta atividade ne’e relembra fila fali sakrifísiu ne’ebé joven sira halo, tinan 26 liubá.

Forsa Armada Libertasaun Nasionál Timor-Leste (FALINTIL) sira ho inimigu sira hasoru malu, tiru malu, kilat ho kilat, enkuantu joven sira iha 1991 ne’e liman mamuk hasoru militár. “Sakrifísiu ne’ebé sira halo nia rezultadu mak ohin loron ne’e”, subliña.

Akresenta, nasaun agora la presiza hasoru ho fatuk, kilat maibé dedikasaun atu servi di’ak liutan. “Agora ita goza, se ita konsiente di’ak, ita fahe, ita-nia goza ne’e ba ita-nia maluk sira ne’ebé mak seidauk goza, ida ne’e mak importante tebes”, akresenta tan.

Jornalista: Rafy Belo

Editora: Rita Almeida

HUSIK IDA HATÁN