Evita Krize, Lider Istóriku Sira Konsensu

0
116
Komandante Jeral FDTL, Major Lere Anan Timur wainhira hatoo nia diskursu iha aniversariu Forsa Defesa Nasional Timor Leste (FDTL) ba dala 16 iha Kuartel Jeral FDTL, Fatuhada, 2 Febreiru 2017.ANTIL FOTO/ANTONIO GONCALVES

DILI (TATOLI)—Majór Jenerál FALINTIL-Forsa Defeza Timor-Leste (F-FDTL), Lere Anan Timur husu ba lider  istóriku sira hanesan Marí Alkatiri, Xanana Gusmão, Ramos Horta, Taur Matan Ruak no sira seluk tan atu konsensu nune’e bele lori estabilidade no dezenvolvimentu mai Timor.

Tuir nia katak situasaun polítika iha rai laran halo populasaun sente ta’uk ka sente preokupadu tanba lider  sira liu-liu lider  istóriku sira laiha konsensu to’o agora.

“Ita nia lider  sira liu-liu lider  primeiru jerasaun hanesan Marí Alkatiri, Xanana Gusmão no José Ramos Horta maka tenke konsensu. Tenke toma konxiénsia katak krize hotu-hotu ne’ebé akontese la’ós komunidade maka halo maibé lider  sira maka halo,” Lere hato’o kestaun ne’e ba jornalista sira iha Palásiu Prezidente Nicolau Lobato, Bairru Pité, Dili, kuarta ne’e, hafoin informa situasaun seguransa no defeza ba Prezidente Repúblika, Dr. Francisco Guterres Lú Olo.

Eis Komandante Gerrilleiru sujere katak di’ak liu lider  sira tenke hamutuk hanesan iha situasaun difisil durante okupasaun estranjeira tinan 24 nia laran, para lori nasaun ida ne’e ba dezenvolvimentu. “Diverjénsia sempre akontese maibé tenke iha nia solusaun,” nia dehan no nia fiar katak nasaun ida ne’e sei la’o ba oin ho hakmatek.

Iha biban ne’e, Majór Jenerál informa ró patrullamentu ne’ebé Austrália atu ajuda ba F-FDTL ne’e la’ós entrega kedas iha tinan ida ne’e maibé tinan hirak tuir mai. Maski nune’e, nia dehan, labele konfia de’it ema seluk maibé tenke konfia an rasik.

“Timor-Leste iha osan maibé ita hakarak depende de’it doadór sira. Karik ema la ajuda ita, ita lori saida hodi kontrola ita nia soberania iha tasi. Governu maka tenke responsabilidade oinsá atu asegura ita nia rikusoin iha tasi laran,” Lere haklaken.

(Jornalista: Xisto Freitas)

(Editór : Manuel Pinto)