Estadu Presiza Diversifika Setór Agrikultura

0
38
Hergui Luina Fernandes Alves, Diretora Kompañia Nova Casa Fresca. Foto espesiál

DILI, (TATOLI) – Hergui Luina Fernandes Alves, Diretora Kompañia Nova Casa Fresca, hatete oportunidade ba investimentu iha Timor-Leste barak maibé nasaun seidauk dezenvolve ho kompletu, nune’e presiza kontribuisaun husi setór privadu nian, liliu setór agrikultura.

Emprezária timoroan ne’ebé hala’o nia investimentu iha agrikultura liuliu ortikultura ne’e dehan agrikultura área ida importante tebes tanba maioria husi populasaun moris husi vida ida ne’e.

“Ha’u investe iha setór agrikultura, área ida ne’ebé importante tebes tanba maioria husi populasaun moris husi vida ida ne’e no ita presiza atu diversifika ita-nia potensiál atu labele depende  de’it ba osan mina nian maibé oinsá mak ita diversifika ekonomia atu kontribui mós ba dezenvolvimentu nasionál”, Hergue hatete iha Timor Plaza, horisehik.

Emprezária ne’e hatutan, sobre investimentu ne’ebé halo iha obstákulu báziku barak ne’ebé hasoru mak asesu ba finanseira maibé bainhira labook-aan maka laiha dezafiu ida mak bele rezolve.

“Dalan ida tenke halo mak komesa investe no bainhira ita tama ona iha laran mak sei hetan dalan sira ne’ebé sai nu’udar solusaun para rezolve no bele dezenvolve ba liur”.

Nu’udar setór privadu buat ida ne’ebé presiza mak garante seguransa bainhira seguransa iha rai-laran la estavel no laiha serteza maka risku ba investimentu ne’ebé halo.

“Impaktu ne’e ami labele dehan laiha kuandu situasaun iha rai-laran ladi’ak fó impaktu ba ami-nia negósiu, ami bele risku ba lakon investimentu no ekonomia rai-laran ladi’ak ema barak lahola ami-nia sasán, impata mós ami-nia atividade emprezariál iha rai-laran, ne’ebé razaun seguransa no polítika importante tebes”.

Nova Casa Fresca ne’ebé hahú nia atividade iha tinan 2015 hala’o servisu ho komunidade hamutuk grupu 28 ne’ebé kompostu husi uma-ka’in 100 resin ne’ebé sai benefisiáriu ba investimentu empreza ida ne’e.

Aleinde ne’e sosa sasán, fó asisténsia téknika atu kuda no ajuda hodi bele prodús ai-han ne’ebé sustentavel nomós atrai juventude atu gosta área ida ne’e.

“Planu iha futuru mellora liután investimentu iha área ida ne’e, ne’ebé agora ha’u komesa investe iha Aileu, iha tempu badak ami sei halo tan espansaun bá Maliana nomós fatin balun iha Dili”.

Nune’e mós planu empreza nian ba oin mak sai líder merkadu ba produtu ortikultura iha rai-laran atubele fornese produtu aihan ne’ebé kualidade, orgániku no evita país husi hamlaha.

“Depois ami kompleta prodús aihan iha rai-laran, ami mós hanoin ba esportasaun hodi promove ita-nia produtu sai bá rai-liur, ne’e dalan ida boot liu atu kontribui dezenvolvimentu nasionál nomós kria balansu ba ita-nia GDP (groos domestic product) tanba ne’e balansu entre esporta no importa”.

Sobre esportasaun kompañia sei iha difikuldade ba iha sertifikadu, bainhira Governu emite ona maka bele esporta tanba produtu aihan labele sai sein iha sertifikadu maibé poténsia atu esporta iha ona.

“Agora depende de’it ba fasilidade husi Governu ba iha sertifikasaun, ami bele hahú ami-nia esportasaun iha produtu agrukultura”.

Jornalista: Maria Auxiliadora

Editora: Rita Almeida

HUSIK IDA HATÁN