Emprestímu Sei Fó Todan ba TL

0
106
Sesaun husu no hatan. Foto: Maubere Gusmão

DILI (TATOLI)-Organizasaun Naun-Governamentál, La’o Hamutuk konsidera katak emprestímu ka debe ne’ebé governu Timor-Leste (TL) halo ho JICA (Japan Internacional Cooperation Agency), ADB (Asean Development Bank) no Xina EXIM Bank sei fó todan boot ba TL iha futuru.

“Tanba fundu petrolíferu bele mamuk no iha posibilidade Timor-Leste sei la hetan osan husi kampu mina seluk,” aprezenta peskizadór La’o Hamutuk, Niall Almond iha nia aprezentasaun kona-ba Mina, Debe no Sustentabilidade: Timor-Leste nia planu ba empréstimu no nia implikasaun ba futuru, iha Salaun enkontru, Asosiasaun-HAK, Farol, Dili, Tersa (14/11).

Nune’e mós TL nia populasaun sei aumenta pursentu 20, TL tenke uza parte husi reseita doméstika hodi selu fila fali debe iha futuru, reseita doméstika mesak sei la to’o atu kobre nesesidade povu TL tomak.

Karik Timor-Leste labele ka lakohi selu fali nia debe, nia kompara katak nasaun barak deklara “default”, FMI (Fundu Monetáriu Internasionál) bele fó “bailout”-empréstimu boot foun hodi selu fila fali debe tuan, nasaun sei lakon soberania-kreditór mak kontrola polítika fiskál, ekonómiku nomós “Austerity”-halo susar ba nasaun ki’ik sira atu dezenvolve.

“Timor-Leste tenke aprende husi nasaun seluk ne’ebé hetan krize debe hanesan Korea, Filipina, Argentina, Grécia, Nigeria, Argentina, Canada, Brasil, UK no Irlanda,” salienta peskizadór Niall Almond.

Tanba ne’e, La’o Hamutuk liuhusi nia peskizadór ne’e konklui katak Timor-Leste labele kontinua gasta no empresta osan billaun ba billaun-la sustentável, tenke avalia projetu boot sira, labele harii infrastrutura boot de’it enkuantu povu presiza buat seluk.

Timor-Leste garantia sei enfrenta “Austerity” ka austeridade iha futuru tanba ne’e di’ak liu lalika debe tan atu nune’e lider TL mak bele kontrola desizaun iha futuru.

Rezultadu peskiza La’o Hamutuk, aprezenta husi peskizadór Niall Almond prevé katak Timor-Leste nia reseita husi mina no gás besik hotu ona.

Razaun, Bayu Undan sei para produsaun iha 2020-21, maibé reseita sei la to’o dolár milaun 100 komesa tinan oin (2018), sunrise bele komesa maibé ita seidauk hatene bainhira, no TL sei hetan hira no iha posibilidade mós sunrise sei nunka komesa.

Estadu depende maka’as ba Fundu Petrolíferu (FP), pursentu 78 osan iha Orsamentu Jerál Estadu (OJE) 2017 hasai direta husi FP, só pursentu 15 mak mai husi reseita doméstika.

FP nia sustentabilidade la serteza tanba OJE 2017 iha planu atu hasai besik 4 ESI (Employees’ State Insurance) entre 2018-2021 no OJE, saldu FP sei tuun ba dolár bilaun 12,3 dolár iha 2022.

Kona-ba funan, funan FP “teorítiku” kompara ho funan emprestímu hatudu katak funan FP dala barak la atinje tarjetu, só iha 2008, 2013 no 2017.

Governu sei kontinua viola RSE (Responsibillity Social and Entreprise) katak FP nia funan sei tuun ki’ik tanba saldu mós sei tuun, FP bele hotu iha tinan 10 -15 tan bainhira FP mamuk nia sei la hetan funan no emprestímu konsensionál ho funan ki’ik maibé emprestímu komersiál boot.

Maioria emprestímu sira mak aloka ba Estrada boot no mega projetu sira hanesan Suai Supply Base, auto-estrada iha kosta sul, aeroportu Díli, drenajen iha Díli no hadi’a Estrada.

Projetu ne’e ameasa povu nia moris no TL nia futuru hanesan mega projetu la iha viabilidade no lori impaktu negativu barak; foti komunidade nia uma no rai agrikultura, estraga komunidade nia moris no ambiente, kria pobreza no konflitu sosiál inklui sei han TL nia rekursu barak.

Karik governu empresta no gasta osan barak ba projetu ne’ebé la hetan retornu, TL sei enfrenta problema boot iha futuru.

Istória emprestímu iha TL haktuir katak governu aprova lei iha 2009 ne’ebé loke dalan ba empresta osan, governu komesa asina kontratu iha 2012 (JICA ADB no Xina EXIM Bank).

TL sei empresta osan ba projetu hitu; estrada neen ho projetu hadi’a drenajen iha Díli.

Reprezentante Ministériu Finansa, Epifanio Martins iha nia aprezentasaun kona-ba “Governu Timor-Leste nia Polítika ba Jestaun Debe Públiku” aprezenta katak to’o oras ne’e governu asina ona akordu emprestímu oioin ho montante hamutuk 410 milloens doláres.

To’o agora dezenbolsa ona purvolta 97 milloens hodi halo no finansia estrada Díli, Baucau, Ainaro, Liquiça nomós entre Manatuto no Natarbora inklui estrada esensiál entre Tasi tolu no Tibar.

“Totál emprestímu JICA nian setenta três ponto três, ADB vinte sete ponto quatro nomós Banku Mundiál setenta cinco milhões. Jestaun dívida ita hatene ona katak ministériu planu no finansa ne’e iha ona unidade ida, sira iha responsável jere kontratu sira no projetu implementasaun,” nia informa.

Entretantu, La’o Hamutuk nu’udar organizasaun naun-governmentál (ONG) lokál ida ne’ebé halo monitorizasaun, peskiza no analiza kona-ba prosesu no polítika dezenvolvimentu sira iha Timor-Leste dezde tinan 2000.

La’o Hamutuk fiar katak povu tomak, feto no mane, mak tenke sai autór prinsipál iha prosesu dezenvolvimentu ne’ebé tenke ekitável, sustentável, demokrátiku no transparente.

Informasaun relevante, http://www.laohamutuk.org/

(Jornalista: Rafy Belo)

(Editór : Manuel Pinto)

HUSIK IDA HATÁN