Dook no La iha Fasilidade Dezmotiva Estudante IPB

0
113
Same. Foto espesiál

DILI, (TATOLI) – Institutu Politékniku Betanu (IPB), Same, Maunfahe nia distánsia do’ok husi Dili, maizmenus kilometru 157 no fasilidade prátika ne’ebé seidauk iha dezmotiva estudante sira hodi estuda iha ne’ebá.

Nune’e iha abertura IPB nian, estudante inskritu na’in 283 ne’ebé estuda iha ne’ebá agora tuun tiha ba 207.

Informasaun ne’e fó sai husi Vise-prezidente administrasaun IPB, Paulino Ribeiro, ba jornalista sira bainhira partisipa semináriu kona-ba ensinu superiór no empregu, organiza husi Ministériu Edukasaun no Kultura (MEK), iha Ministériu Finansa (MF) ne’ebé sei remata ohin, kinta (23/11).

“Iha primeiru semestre ita iha alunu hamutuk duzento ointenta e três, depois iha ezame semestre remata, sira iha duzentos cinquenta e seis mak sei eziste nafatin, pois tama fali ba segundu semestre to’o agora hetan de’it 207 pessoas”, informa.

Paulino Ribeiro haklaken estudante IPB sira, segunda (20/11), hahú ezame para determina sira-nia ano zero.

Ano zero ne’e katak tenke rekonsília fali matéria sira husi SMA (Sekolah Menengah Atas) ka ensinu sekundária ho didi’ak nune’e bele tama ba ano akadémiku.

Iha tinan oin sira tama ona ba ano akadémiku, ne’e halai liu ba disiplina produtivu katak disiplina sira ne’ebé mak liga ba estudante sira-nia kompeténsia.

Kona-ba dosente sira, Vise-prezidente Paulino Ribeiro informa IPB serbisu hamutuk MEK no Komisaun Funsaun Públika (KFP) loke hela konkursu hodi halo rekrutamentu atu hanorin iha tinan akadémiku 2018.

Agora tama ona ba faze selesaun dokumentu. Selesaun dokumentu sei hahú iha sesta to’o segunda, ba eskola superiór rua; eskola superiór enjeñária ho eskola superiór agronomia. “Dosente ne’e ami presiza hamutuk 25, sei ba iha tinan oin”, informa.

Paulino hatutan profesór sira ne’ebé mak agora atu rekruta ne’e sira nível lisensiatura ho mestradu, tanba IPB hahú ho Baxarelatu Diploma II. Kuandu rekursu ne’ebé mak hanorin hasa’e ona sira-nia akadémiku maka sei hasa’e kursu DII ba DIII no DIII ba DIV.

Iha planu estratéjiku IPB nian hahú husi DII depois maka sei sa’e ba DIII no DIII sei ba DIV ka bele ba mestradu bainhira ita-nia rekursu umanu ne’ebé mak preparadu hanorin kumpletu ona.

Agora dadauk dosente na’in 10 mak hanorin iha área transversál; matemátika, fízika, kímika, biolojia, étika morál, língua tetun, língua inglés nomós língua portugeza ho língua malaiu.

“Língua malaiu IPB serbisu hamutuk hela ho Sentru Kulturál Indonézia nian iha Dili, sira haruka dosente ba iha ne’ebá, hamutuk matéria 11”, haktuir Vise-prezidente.

Paulino Ribeiro dehan atu rezolve problema fasilidade no preokupasaun estudante sira nian, IPB halo konkursu no dezeña dormitóriu ba estudante sira nomós BoQ (Bill of Quantity) hotu ona.

Enkuantu hein dormitóriu, oras ne’e dadaun estudante sira sei hela iha uma MDG’s (Millenium Development Goal’s) no hela iha komunidade sira-nia uma.

“Fasilidade ba prátika nian, hotu-hotu tama ona iha tenderizasaun, kompañia sira hola ona sasan prátika nian, hein de’it janeiru ka fim-de dezembru sasan sira ne’e to’o ona, bele ba iha Institutu Politékniku Betanu”, informa tan.

“Dormitóriu, BOQ no dezeñu sira kumpletu ona, hein de’it ona orsamentu tau para ba halo. Tanba ne’e mak studante sira sei ba hela iha komunidade sira-nia uma no aluga komunidade sira-nia uma. Ba tinan oin mós komunidade Betanu prontu hela atu simu estudante sira bainhira ba”, informa tan.

Jornalista: Rafy Belo

Editora: Rita Almeida

HUSIK IDA HATÁN