DIT Marka Deferénsia Iha Indústria Edukasaun TL

0
53
Foto espesiál

DILI (TATOLI)-Reitór DIT (Dili Institute of Tecnology), Alvaro Menezes Amaral afirma, DIT ohin loron kontinua ré dezeñu kurríkulu, nune´e reprezenta duni DIT nia kompeténsia prinsipál hodi marka diferensa iha kompetisaun indústria edukasaun Timor-Leste (TL).

DIT nia dezenvolvimentu hahú halo ona mak primeiru, leno aan ba vizaun, misaun no planu estratéjiku DIT nian ho dalan úniku prodúz kualidade liuhusi kompetisaun. Segundu, rekursu pesoál.

“DIT fiar aan nafatin atu hateke ba futuru,” Alvaro Menezes realsa perante graduadu no família sira, iha graduasaun DIT nia ba da-sia, tema: “Habiit Aan Via Dixiplina no Konsisténsia Dezempeña Nodi Serbí” iha kampus DIT, Ai-meti laran, Manleuana-Dili, Tersa (25/11).

Universidade DIT tuir reitór Alvaro oras ne’e daudaun iha dosente permanente na´in 130 ho grau akadémiku mestradu, kandidatu Phd no Phd (doutoramentu).

DIT mós investe maka´as mós iha fasilidade fízika hanesan sala-de-aula, laboratóriu no biblioteka hodi fasilita prosesu aprendizajen bele la´o ho di´ak.

Aleinde ida ne’e iha tinan 2013, DIT mós hahú tiha ona introdús língua inglés nu´udar língua instrusaun iha prosesu aprendizajen liuhusi Eskola Superiór Turizmu no kontinua ho Eskola Superiór Siénsia Enjeñaria.

“Tinan oin, língua inglés sei introdús tomak iha programa estudu hotu-hotu DIT nian,” Reitór hato’o.

“Habiit Aan Via Dixiplina no Konsisténsia Dezempeña Nodi Serbí”

Reitór institutu akadémiku privadu ne´e haklaken, bazeia ba tema graduasaun da-sia DIT nian, prosesu aprendizajen la´ós de´it atu prodúz GPA (Grade Point Average) ka IPK (Indeks Prestasi Kumulatif) ne´ebé aas ka estudante melor iha siénsia espesífika ruma, maibé tuir rezultadu peskiza husi peskizadór amerikanu, Thomas Stanley hatuur ona kategoria hamutuk 100, fatór ne´ebé determina ema atu hetan susesu.

IPK ne´ebé aas la tama iha fatór determinante númeru um to´o dés  atu halo ema sai susesu, maibé iha liu númeru trinta. IQ (Intelegence Quotient) ne´ebé aas la tama iha númeru um to´o dés  maibé monu iha númeru vinte e um.

Fatór determinante atu hetan susesu, tuir Thomas Stanley mak onestu, dixiplina, liga ema seluk, apoiu husi feen ka la´en, serbisu maka´as liu ema seluk no hadomi nia serbisu rasik.

“Ho referénsia hanesan ne´e fó mensajen ba ita kona-ba importánsia dixiplina no konsisténsia dezempeña hodi serve nafatin estudante, inan-aman, komunidade no Timor-Leste,” reitór Alvaro Menezes reforsa.

Hodi kontinua husu ba graduadu na´in 495 katak serimónia graduasaun ne´ebé hala´o ne´e nu´udar pasu primeiru, husi oin ba oin sei enfrenta dezafiu barak liután, liu-liu kompetisaun ne´ebé maka´as, tanba ne’e tenke estuda nafatin hodi halo transformasaun ba família, kolega no ikus liu bele transforma ita-nia nasaun.

Reitór Alvaro Menezes mós hato´o obrigadu ba governu TL via Ministériu Edukasaun no Kultura (MEK) no parseiru DIT nian inklui inan-aman no mós sívita akadémika DIT nian ba vontade, comitment (kompromisu) maka´as ho serbisu la kolen hodi lori DIT to´o hetan naran di´ak iha sosiedade ho indústria.

Entretantu, graduadu DIT tinan 2017 ne´e, hamutuk ema na´in 495, kompostu mós DIT KREO (Kampus Rejionál Enklave Oe-cusse). Graduadu hirak ne´e mai husi School of Enginering and Science ho departamentu hanesan konstrusaun sivíl, enjeñaria mekánika no siénsia komputadór, ema na´in 161.

Tuir mai, School of Petroleum ho departamentu mak enjeñária petroleum no jestaun petroleum, graduadu na´in 144.

Seluk, School of Bussiness and Management ho departamentu hanesan jestaun Finansa, agribusiness, jestaun polítika públika, jestaun rekursu umanu no jestaun merkadoria, graduadu na´in 95.

Nune´e mós, School of Tourism and Hospitality ho departamentu hanesan jestaun otélária no tour no jestaun viajen, graduadu na´in 95.

Antes ne´e, iha tinan letivu 2009 to´o 2016, ensinu superiór privada ne´e prodúz ona rekursu umanu hamutuk ema na´in 1934.

(Jornalista: Rafy Belo)

(Editór : Manuel Pinto)

HUSIK IDA HATÁN