Distribuisaun Fini Seidauk Suficiente ba Agrikultór Sira

0
39
Batar. Foto espesial

DILI, (TATOLI) – Ministériu Agrikultura no Peska (MAP) distribui ona fini batar tonelda 50, hare 50, fore-rai no fore-mungu balun husi produtór fini komersiál rai-laran maibé seidauk to’o nesesidade agrikultór sira-nian.

Xefe Departamentu Fini, MAP, Fernando Soares, informa produsaun fini iha tinan ne’e aas maibé problema mak Governu tau osan uitoan.

“Ezemplu, batar hamutuk tonelada 120 maibé Governu aloka de’it osan ba tonelada 50 no tonelada 70 hanesan ne’e lakonsege distribui tanba la sosa, depois hare hamutuk tonelada 218 maibé sosa de’it  50 no restu 150 resin ne’e abandona hela”, Fernando hatete iha Komoro, ohin.

Kona-ba fini fore-rai, ba tarjetu nasionál ne’e tonelada 10 maibé tanba ho mudansa klimátika entaun kolleta tonelada neen de’it no daudaun distribui hela.

“Hare mak daudaun iha preparasaun, tenta atu halo distribuisaun. Só agora problema mak Asosiasaun Nasionál Produtór Fini Komersiál, nia uitoan husi barak ne’e bele fahe hanesan (fini) ba nia membru sira tenke hetan hotu ba hare ne’ebé sira prodús ne’e. Produsaun di’ak soké alokasaun orsamentu husi ministériu ba tinan ida ne’e ki’ik loos tanba liga ho tinan polítika nian, retifikativu mós lala’o no sai problema ba tékniku ne’ebé besik loos ho sira (agrikultór) ne’e sente”.

Tanba MAP aloka de’it osan ba kada fini tonelada 50, nune’e kuaze diretór sira iha munisípiu hotu la aseita ba desizaun ida ne’e tanba nesesidade liu ida ne’e, bainhira halo distirbuisaun ba iha Ainaru, Ermera no Likisá distribui kada tonelada haat ka lima maibé lato’o nafatin maski fini iha maibé lasosa tanba menus orsamentu.

“Situasaun polítika, situasaun orsamentu bele afeta ba tékniku sira liuliu hanesan fini tanba nesesidade boot liu duké orsamentu ne’ebé tau. Ita triste mak fini iha maibé labele distribui”.

Problema seluk mak distribuisaun fini latuir tempu loloos tanba liu tiha epoka atu kuda fini ne’ebé akontese iha tinan hirak liubá no fini sira ne’e para de’it iha armazein munisípiu.

“Tanba ema presiza atu kuda ne’e tempu liu tiha ona. Ita-nia problema agora mak fini ba latuir tempu loloos, latuir kuantidade ba nesesidade, ne’ebé ba oin ita tenke hadi’a”.

Fernando relata iha tinan tolu liubá distribuisaun fini mínimu tonelada 100 no tuir loloos bainhira populasaun aumenta, fini mós tenke aumenta maibé ho tinan polítiku no menus orsamentu maka lakonsege nesesita agrikultór sira. 

Jornalista: Maria Auxiliadora

Editora: Rita Almeida

HUSIK IDA HATÁN