Dialog Alkatiri ho Taur, PR Lú Olo La Bele Impoin

0
451
Leovigildo Hornay

DILI (TATOLI)—Eis Prezidente Konsellu Nasionál Juventude Timor-Leste, Leovigildo Hornay, husu ba Prezidente da Repúblika, Francisco Guterres Lú Olo la bele impoin iha dialog entre Primeiru Ministru, Mari Alkatiri ho Prezidente Partidu Libertasaun Popular (PLP) Taur Matan Ruak, maibé tenke hola desizaun ida ne’ebé prudente.

“PR tenke hola opsaun ne’ebé mak mais seguru,  estavel no sustentável, bainhira PR obriga, nia risku sei todan liu tan ba estabilidade governativa,” Leovigildo Hornay hato’o ba Ajénsia Tatoli bainhira hasoru malu iha Otél Timor, ohin.

Tuir Eis Sekretáriu Estadu Juventude Desportu ne’e bainhira Prezidente Repúblika impoin sei fó konsekuénsia ba estabilidade governu iha futuru mai. Tanba nia haree katak, iha dialog ne’e Taur Matan Ruak sei ba ho nia idealizmu nune’e mós Primeiru Ministru, tanba ne’e, sira Nain rua sei la konsege entende malu iha substansiál ruma hosi dialog ne’e rasik.

“Dialog ne’e tenke permanénsia iha natureza hakmatek, amizade, sentidu de pretense maski  dialog sira ne’e bele formalidade de’it tanba Maun Boot Kay Rala Xanana Gusmão ho Taur Matan Ruak sei defende sira nia idealizmu ne’ebé sira iha, nune’e mós lider partidu Fretilín no Partidu Demokrátiku,” nia observa.

Tanba ida ne’e, Leovigildo haree katak, iha dialog ne’e sei la hetan entendimentu signifikante ida, basa sira ida-idak (Xanana, Taur, Alkatiri) mai  ona ho nia pensamentu.

Tanba pensamentu mantein, Prezidente da Repúblika tenke uza nia kompeténsia hodi jere situasaun refere. Opozisaun ne’ebé hanaran an Aliansa Maioria Parlamentár (AMP) sei susar atu apoia governu haree ba polítika sira ne’ebé durante ne’e sira hatudu. Nune’e mós, Governu ne’ebé lideradu hosi Dr. Mari Alkatiri mós difisil atu simu de’it saida mak AMP hakarak impoin ba nia governasaun.

 “Prezidente Repúblika tenke uza nia kompeténsia atu haree situasaun ne’e, mantein governu ka konvida fali Aliansa Maioria Parlamentár atu forma governu. Prezidente tenke halo leitura ida ho kuidadu antes to’o iha solusaun ida, situasaun sira hanesan ne’e Prezidente rasik mak sei garantia,” Nia esplika.

Hodi subliña katak, eleisaun antisipada nu’udar dalan ida mós  bainhira la iha solusaun hotu, maibé presiza mós tetu konsekuénsia bainhira iha eleisaun antisipada. “Fiar ba, Se iha eleisaun antisipada sei implika ba gastu, númeru votante sei tun. Tanba ne’e, eleisaun antisipada la devia atu ko’alia.”

Prezidente Repúblika tenke kuidadu, basa Leovigildo haree katak, Prezidente da Repúblika mai hosi forsa polítika ida mós ho nune’e atu hola desizaun ida ne’ebé prudente Prezidente Repúblika tenke kore an hosi partidu hodi nune’e desizaun ne’ebé ikus mai Prezidente hola bele garantia duni estabilidade governantiva.

Nu’udar jerasaun foun Leovigildo apresia ba inisiativa Prezidente da Repúblika ba buat ne’ebé mak Prezidente Repúblika halo liu-liu promove dialog entre lider governu ho opozisaun atu asegura estabilidade governativa.

“Ita hein katak Prezidente Repúblika sei koko opsaun segundu (konvida AMP forma governu) para lalika too iha eleisaun antisipada.” Leovigildo fó hanoin tan.

 (Ekipa Redasaun)

HUSIK IDA HATÁN