Daniel Marçal Hetan Ona Pose Husi PM

0
130
Primeiru-Ministru, Mari Alkatiri, fó pose ba Daniel Marçal hodi kontinua sai Sekretáriu Ezekutivu Komisaun Nasionál Kombate HIV/SIDA, iha Palásiu Governu, ohin. Foto GPM

DILI, (TATOLI) – Governu Konstitusionál dahituk liuhusi Primeiru-Ministru, Mari Alkatiri, fó ona pose ba Daniel Marçal hodi kontinua sai  Sekretáriu Ezekutivu Komisaun Nasionál Kombate Human immunodeficiency virus infection and acquired immune deficiency syndrome (HIV/SIDA), atu hala’o serbisu ho di’ak no forte liután ba oin hamutuk ho membru Konsellu Nasionál  no entidade hotu ne’ebé mak oras ne’e hahú programa espesial ba HIV/SIDA no ba Timor-Leste laran tomak.

Daniel hafoin tomada pose hatete, esforsu ne’ebe halo mak halo kampaña, advokasia ho Na’i-ulun sira  no parte relijiozu hotu oinsá konvense ema nia partisipasaun hodi envolve iha programa prevensaun HIV/SIDA.

“Liuliu oinsá atu konvense ema iha parte lala’ok seksuál ne’ebé livre liu, halo ho nia konsikuénsia tranzmite ba HIV/SIDA. Ida ne’e mak esforsu ida ne’ebé mak atu halo, bá oin koordena ho entidade hotu liuliu oinsá atu halo akonsellamentu morál ba juventude, estudante sira para iha koñesimentu kle’an liuliu ba nesesidade báziku hanesan relasaun seksuál atu ita komesa redús tanba maioria HIV iha Timór no mundu hotu tranzmite ba ema liuhusi relasaun seksuál livre demais”, Daniel dehan iha Palásiu Governu, ohin.

Tanba númeru HIV/SIDA aumenta, Danie dehan atu redús ida ne’e liuhusi mekanizmu ida mak hotu-hotu tenke partisipa, iha koñesimentu ida di’ak, tanba ne’e Governu harii Komisaun ida ne’e atu halo kampaña hodi konvense ema hotu.

“Dadus sa’e ne’e tuir loloos progresu ida, tanba sá? Uluk ema tauk bá koko raan, ema tauk hatudu aan, agora ema fasil, lamoe, lata’uk, ida-idak iha konsiénsia rasik bainhira deskonfia nia-aan buat ruma ladi’ak, nia lori nia-aan bá koko raan. Tanba ne’e mak ema bá koko raan no ita identifika ema barak, progresu ida, ema tauk dehan kazu sai barak ne’e problema no komisaun iha ona mós kazu ne’e sa’e beibeik ne’e laiha”.

Daniel esplika moras HIV ne’e bainhira da’et ona ba ema ida, tinan rua ka haat mak bele identifika tanba loron ida ema ne’e foin hasoru problema saúde mak foin bele hatene bainhira ema ne’e halo teste no hetan moras HIV.

“Mas balun la’ós HIV ona maibé monu ona ba SIDA. Tanba ne’e mak atu konvense ema hotu labele ta’uk no moe di’ak liu lori aan bá teste tanba mais fasil ita halo tratamentu, intervensaun iha faze HIV duké monu ba SIDA ne’e bele mate ou moris”.

Tuir dadus husi Ministériu Saúde to’o fulan-juñu ne’e ema ne’ebé moras HIV/SIDA hamutuk 703 no mate 85.

Primeiru-Ministru, Marí Alkatiri, iha nia intervensaun ba tomada pose ne’e hatete númeru ema ne’ebé ohin loron sofre síndrome ne’e aumenta signifika tenke diminui.

“Tanba ne’e bolu atensaun Sekretáriu Ezekutivu naturalmente ho kooperasaun estreita ho polítika saúde Ministériu Saúde atu ezerse nia funsaun. Objetivu mak kombate ho siénsia hotu ne’ebé iha. Ita-boot nia susesu mak susesu ba ita-nia oan sira, ba ita-nia bei-ona sira”.

Daniel Marçal antes ne’e hala’o ona nia kna’ar durante tinan haat iha Komisaun no iha loron 30 Novembru iha Governu ida ne’e  haforsa tan hodi fó pose ba nia.

Jornalista: Maria Auxiliadora

Editora: Rita Almeida

HUSIK IDA HATÁN