Dala Ida Tan, PPN Hatun OR Ba Komisaun C

0
449
Prezidente Parlamentu Nasionál, Aniceto Guterres, bainhira hatan jornalista sira iha Palásiu Prezidente Nicolau Lobato Bairo Pité, ohin. Foto mídia PR

DILI (TATOLI)—Prezidente Parlamentu Nasionál, Aniceto Guterres deside hodi fó fila Proposta Orsamentu Retifikativu ba Komisaun C, asuntu Finansa Públika, hafoin plenária vota kontra karater OR ho Urjénsia.

“Pedidu karakter urjénsia husi Governu la pasa, nune’e Parlamentu Nasionál fila fali ba prosesu normál ka prosesu normál ho Orsamentu jerál Estadu ninian,” PPN Aniceto Guterres afirma iha plenária hafoin fó sai rezultadu votasaun urjénsia ka lae OR tuir pedidu sétimu governu nian, horisehik.

Rezultadu Votasaun hosi Parlamentu Nasionál (PN) kona ba Proposta Lei no 1/IV (1*) Urjénsia, alterasaun dahuluk ba lei no 13/2016 29 Novembru ne’ebé aprova Orsamentu Jerál Estadu (OJE) 2017 no sita mós konaba Orsamentu Retifikativu (OR), ikus mai la pasa tanba bankada opozisaun kontra ho votu 35 no bankada governu iha votu 30 de’it.

Ho nune’e OR, PN sei la trata hanesan urjénsia maibé trata hanesan normál bazeia ba rejimentu PN.

Normalmente komisaun C simu no estuda halo pareser no aprezenta relatóriu hafoin halo kalendáriu ba apresiasaun no votasaun ba OR tuir prazu ne’ebé mak determinadu ona (bele loron sanulu ou neen)

Iha fatin hanesan Ministru Prezidénsia Konsellu Ministru, Adriano Nascimento, reprezenta governu iha sesaun plenária hateten governu hatuur OR nu’udar urjénsia tanba governu konsidera OR importante tebes ba povu no nasaun, tanba OJE 2017 la to’o atu selu sasan ne’ebé tenke selu agora hanesan halo pagamentu ba projetu antes tinan fiskál ne’e taka.

Reprezenta bankada Opozisaun, deputadu CNRT, Arão Noe husu atu governu profundu tan dadus iha OR hodi justifika katak, OR ne’e ajuda povu duni.

Proposta hosiOR Governu nian, aumentu hosi konta públika dolar biliaun 1,34 ba 1,6 no inklui, dolar millaun 12 resin hodi hala’o eventual eleisaun (parese eleisaun antissipada).

Antes ne’e, PPN hatun (baixa) uluk ona OR ba komisaun C ho karater urjénsia, iha loron, 10/11 maibé ikus mai la pasa tanba hetan rejeisaun hosi maioria iha komisaun C, hafoin estuda iha oras rua nulu resin hat sura hosi PPN hatun ba komisaun C.

(Jornalista: Julia Chatarina)

(Editór : Manuel Pinto)

HUSIK IDA HATÁN