BAMP Hakarak Halo Ajenda Rekursu Desizaun PPN no Mosaun Sensura

0
564
Xefe Bankada Partidu Libertasaun Popular (PLP), Fidelis Magalhães.

DILI, (TATOLI) – Bloku Aliansa Maioria Parlamentár (BAMP) liuhosi reuniaun líder bankada iha Parlamentu Nasionál (PN) hakarak halo ajendamentu ba rekursu desizaun Prezidente PN kona-ba karatér urjénsia Orsamentu Retifikativu (OR) nomós mosaun sensura ne’ebé BAMP hato’o iha plenária foin lais.

“Ohin ami ko’alia ajendamentu rekursu kona-ba desizaun urjénsia nomós ajendamentu mosaun sensura, nune’e ami aprezenta ami nia razoens, pontu de vista no pozisaun bankada sira hotu, Prezidente Parlamentu Nasionál sei halo desizaun ruma kona-ba asuntu ne’e”, tenik Xefe Bankada Partidu Libertasaun Populár (PLP), Fidelis Magalhães, ba jornalista sira iha PN hafoin reuniaun líder bankada, ohin.

BAMP ne’ebé kompostu husi partidu opozisaun (CNRT, PLP, no KHUNTO) hakarak halo desizaun no rezultadu ne’ebé lais atu haree oinsá pasu ba oin.

Iha parte seluk sekretária meza PN, Lídia Norberta, esplika rejimentu PN nian katak bainhira karatér urjénsia OR la hetan dalan atu bele konsidera iha plenária, entaun tenke foti dalan seluk mak liuhosi prosesu normál, entaun liuhosi prosesu ne’e prezidente baixa fali ba komisaun espesializada permanente hitu.

“Signifika katak hahú husi tersa loron 21 novembru laiha plenária no husi loron ne’e kedan durante loron neen kada komisaun espesializada permanente sei servisu iha idak-idak nia komisaun hodi haree ba temátika ne’ebé mak governu submete”, informa tan.

Xefe Bankada PLP dehan hahú loron 21 novembru ba oin laiha atividade iha komisaun tanba mosu diskordansia, enkuantu bankada governu (FRETILIN no PD) marka prezensa iha komisaun maibé BAMP kontinua la marka prezensa iha reuniaun komisaun nian.

Kona-ba ajendamentu rekursu ida ne’e ba desizaun Prezidente PN, nia akresenta bankada governu haree katak laiha ona dalan atu diskute konaba asuntu rekursu tanba tuir loos diskute ona iha loron 20 novembru nian maibé bankada opozisaun haree katak sei iha dalan no bele ajenda hodi diskute ba rekursu ne’ebé aprejenta.

“Nune’e Prezidente Parlamentu Nasionál nu’udar xefe ne’ebé prezide meza Parlamentu Nasionál, buka nafatin hatudu imparsialidade katak nia reprezenta husi bankada lima ne’e hotu, tanba ne’e nia sei foti desizaun no fó  sai ba públiku iha tempu badak”, katak tan.

Alende ne’e, agora dadaun PN mós iha difikuldade konaba ajendamentu tanba loron hirak tuir mai sei iha komemorasaun loron 28 novembru. Tanba ne’e mak difikulta mós Prezidente PN atu foti desizaun konaba loron sertu hodi ajenda kestaun rua ne’e.

Enkuantu la’ós de’it Prezidente PN mak sei marka prezensa iha komemorasaun loron ne’e maibé kuaze deputadu hotu.

Jornalista: Julia Chatarina

Editora: Rita Almeida

HUSIK IDA HATÁN