Asosiasaun Agrikultór Husu Governu Liga Sira Ba Merkadu

0
45
konferénsia dahuluk Asosiasaun Agrikultór no kooperativa. Foto/Facebook.

DILI, (TATOLI) – Asosiasaun Agrikultór no Kooperativa hala’o konferénsia dahuluk nian no iha ámbitu ne’e husu ba Governu atu liga sira ba merkadu tanba estabelese tiha grupu ne’e maibé merkadu seidauk klaru entaun difisil uitoan atu la’o ba oin.

Tanba ne’e asosiasaun ho Governu liuhusi sorumutuk ne’e hanoin lisuk oinsá haree ba merkadu atu nune’e atividade asosiasaun nian tenke la’o ho di’ak no halo rekollamentu ba produtu agrikultór sira ne’e presiza fatin apropriadu ruma.

Asosiasaun Agrikultór sira partisipa iha konferénsia dahuluk nian.

Prezidente Asosiasaun Agrikultura Karau-Ulun, Elias Tilman, hatete uniaun ida ne’e hanesan mahon ba agrikultór sira hotu, entaun estabelesimentu ida ne’e tenke haree nia merkadu se la’e asosiasaun la’o latuir dalan maski rekolla tiha produtu mas merkadu laiha signifika laiha buat ida.

“Governu tenke hanoin tanba ita iha ona asosiasaun maibé iha mós merkadu ruma para atende atu iha futuru la’o ho di’ak liután. Asosiasaun la’ós atu ko’alia hela de’it maibé tenke hamutuk ho Governu atu haree buat balun ne’ebé ita atu halo ba oin”, Elias dehan iha Otél Timor, ohin, bainhira partisipa iha konfrénsia ho tema “Profesionaliza asosiasaun no kooperativa agrikultór hodi fasilita transformasaun agrikultura subsisténsia ba agrikultura orientasaiun merkadu.

Elias hatutan maski iha difikuldade maibé iha dalan atu atinje no hakat nafatin atu nune’e atividade ne’ebé grupu ne’e halo hanesan rekolla produtu lokál balun tenke fa’an iha merkadu.

Tanba ne’e tenke halo esforsu hamutuk ho própriu agrikultór sira oinsá mak bele fó informasaun atubele prodús liután pordutu lokál nune’e bele hamenus importasaun produtu rai-liur nian.

“Kria mós kualidade ba ita-nia produtu sira atubele avansa ba merkadu tanba merkadu presiza kualidade produtu no asosiasaun tenke garante kualidade hodi redús ona importasaun”.

Diretór Agro-Komérsiu, Ministériu Agrikultura no Peska (MAP), Fernando Egidio Amaral, dehan iha konférénsia dahuluk ne’e atu buka fórmula di’ak hodi servisu hamutuk entre entidade hotu atubele halo transformasaun agrikultura subsisténsia ba agrikultura ne’ebé orienta bá merkadu.

“Konferénsia asosiasaun halo ne’e tanba 70 porsentu agrikultór iha Timór laran tomak ne’e ida-idak la’o ninian, sei dezorganizadu entaun sira laiha kbiit atu serbisu iha área agrikultura ne’ebé ita dehan bele di’ak liután atu aselera nia dezenvolvimentu ba iha merkadu. Ita lori asosiasaun atu aprezenta sira-nia esperiénsia rasik para entidade hotu rona atu ita hatene nesesidade saida mak presiza atu hadi’a ba oin”.

Fernando hatutan husi parte Governu nia iha programa no etratéjia  atu apoiu sira la’o hamutuk hodi halo transformasaun agrikultura ne’ebé orienta ba merkadu, nune’e fasilita produtu sira kompete iha merkadu atu sira sente katak serbisu ida ne’e la’ós fo’er maibé bele muda sira-nia moris.

“Planu merkadu ba asosiasaun iha oin tolu, ita hakarak kria iha asosiasaun laran, merkadu ida seluk mak hadomi ita-nia produtu ne’ebé inisia husi ita-nia agikultura ba iha funsionáriu sira depois merkadu ida fali mak fornese produtu ba iha CLS (Centro Logística Nacional) para halo intervensaun ba iha dezastre naturál bainhira hahán laiha, ida ne’e mak ita hakarak atu promove”.

Jornalista: Maria Auxiliadora

Editora: Rita Almeida

HUSIK IDA HATÁN