iklan

NASIONÁL, JUSTISA, MUNISÍPIU

António Promete Servi Estadu ho Imparsialidade

António Promete Servi Estadu ho Imparsialidade

DILI (TATOLI)-Primeiru-ministru, Marí Alkatiri fó pose ba Komisáriu Funsaun Públika (KFP) foun, António Freitas, hodi substitui eis-komisária Maria Olandina Caero tan hala’o kna’ar foun nu’udar embaixadora iha Malázia.

“Hamriik iha ne’e atu serbi makina estadu, no sei hatudu iha indikasaun imparsialidade, transparánsia ba desizaun atu serbi ba makina estadu nian,” deklara komisáriu António Freitas bainhira simu pose husi primeiru-ministru iha Palásiu Governu, segunda (20/11).

Komisáriu ne’e hatutan, desizaun hotu-hotu tenke bazea ba lei ne’ebé eziste atu regula funsionamentu makina estadu nian.

Dezempeña funsaun ho profisionalidade, la haliis ba grupu ida, la rasista hodi estamina iha kondisaun hotu-hotu iha prosesu funsionamentu makina estadu nian.

“Nu’udar komisáriu sei koopera hamutuk, husi prezidente funsaun públiku, komisáriu no membru governu espesialmente primeiru-ministru nomós órgaun seluk tan,” garante komisáriu ne’e.

Nia konvida funsionáriu públiku sira atu koopera hamutuk hodi kompleta prosesu ne’ebé mak eziste, liu-liu internalmente iha funsaun públika ninian.

“Nu’udar komisáriu ne’ebé substitui señora Olandina ne’ebé agora tutela kargu foun, ha’u asume kargu indisiplinár ninian, kondisaun ne’ebé ha’u sei foti, ha’u sei konsulta ho ekipa tomak, koopera tomak ao mesmo tempu atu bele asegura ligasaun, publikasaun institusionál governu nian purenkuantu foti desizaun tuir prosesu ne’ebé mak eziste,” nia haklaken.

Primeiru-ministru, Marí Alkatiri iha nia intervensaun hateten katak despolitiza funsaun públika importante tanba ne’e funsionáriu públiku labele halo polítika bainhira sei halo hela serbisu.

“La signifika katak funsionáriu sira labele sai membru ba partidu A ka B. Bele, maibé bainhira sama ona mai serbisu fatin, halo serbisu ba funsaun públiku, labele konfunde ho funsaun seluk,” nia akresenta.

Xefe governu ne’e mós kongratula KFP no komisáriu António Freitas tanba promove no jerasaun foun no nu’udar jerasaun asume kargu importante ne’e.

“Ha’u fó parabéns ba komisáriu foun ne’ebé ohin simu tomada de pose, parabéns mós ba Komisaun Funsaun Públika, hahú ona tranzisaun ba jerasaun foun iha funsaun públika,” nia kongratula.

 Iha tomada de pose ba komisáriu António Freitas, asiste direta husi Prezidente KFP, Faustino Cardoso, Komisária Maria Domingas Alves inklui ministru estadu no ministru rekursu naturál, Mariano Sabino.

 (Jornalista: Rafy Belo)

(Editór : Manuel Pinto)

iklan
iklan

Leave a Reply

iklan
error: Content is protected !!