AMP Seidauk iha Estrutura Ofisiál

0
277

DILI, (TATOLI) – Xefe Bankada Partidu Libertasaun Populár (PLP), Fidelis Magalhães informa estrutura sombra ba Governu VIII ne’ebé espalla iha mídia sosiál konsidera deskarateriza Aliansa Maioria Parlamentár (AMP).

“Ami deskoñese estrutura sombra ba VIII Governu ne’ebé publika iha facebook ne’e konsidera ema mak hakarak atu hamate ami nia karatér”, dehan Magalhães ba ajénsia Tatoli iha Parlamentu Nasionál, ohin.

Nia hatutan, estrutura sombra ne’e ho objetivu estraga de’it situasaun, tanba dadaun ne’e AMP seidauk iha estrutura ne’ebé ofisializa enkuantu durante ne’e diskusaun ba formasaun estrutura sombra mós laiha.

“Ami haree ema deskoñesidu atu goja ami no kontinua hatun ami maibé ami toman ona kona-ba liafuan hirak ne’e hanesan akuzasaun no maltratu”, hateten nia.

Nune’e mós, estrutura sombra ne’e hanesan atentadu ida atu deskarateriza AMP atu hanesan ne’e no hanesan ne’eba.

Iha fatin hanesan, deputadu hosi bankada Kongresu Nasionál Rekonstrusaun Timor (CNRT-sigla portugés), Aderito Hugo, afirma ema halo espekulasaun oioin hodi koloka estrutura sombra ne’e tun sa’e tanba sira aproveita internet gratuita ne’ebé durante ne’e iha fatin-fatin.

“Asuntu hirak ne’ebé mósu iha facebook eh ID falsu ne’e ha’u la fó resposta ba ne’e tanba dalaruma ema tur iha ai-mahon ida ho internet gratuita depois nia hanoin de’it koloka tun sa’e hodi fó resposta ba nia án”, akresenta.

Tuir nia AMP to’o agora seidauk iha dokumentu formál ida kona-ba estrutura sombra atu fá apresiasaun.

Jornalista: Zezito Silva

Editora: Rita Almeida

HUSIK IDA HATÁN