AMP Aprezenta Tan Ona Mosaun Sensura Hasoru Governu

0
2236
Deputadu Hosi Bankada Fretilín ho PD hit kartaun Mean.

DILI (TATOLI)—Bankada Opozisaun Aliansa Maioria Parlamentár (BOAMP), aprezenta mosaun sensura hasoru sétimu governu konstitusionál, ho rajaun to’o ohin loron governu seidauk aprezenta programa governu ba daruak hafoin dahuluk hetan rejeisaun hosi Parlamentu nasionál foin lalais ne’e.

“Artigu 111. Ami aprezenta Mosaun sensura nian hasoru governu tanba to’o ohin loron seidauk iha programa ruma mak governu aprezenta mai Parlamentu nasionál,” Depuutadu CNRT Patrocínio da Costa levanta iha Plenária Parlamentu Nasionál, ohin.

Razaun AMP aprezenta mosaun sensura hasoru governu tanba konsidera governu aprezenta Orsamentu Retifikativu bainhira programa governu daruak nian seidauk aprezenta hafoin ida dahuluk hetan rejeisaun.

Entretantu AMP kontra Orsamentu Rektifikativu tanba; La iha Lei Orgánika VII Governu Konstitusionál hodi deskreve kompozisaun estrutura governu ne’ebé reflete estrutura orsamentál ne’ ebé deskreve iha PPL Orsamentu Retifikativu ne’ e;

La iha tabela sira ezekusaun orsamentál ba despeza no reseita nian hosi 9 de Novembru, ho projesaun detalhadu, tuir kategoria no item, to’o ezekusaun 31 de Dezembru 2017, ba fundus hotu-hotu no serbisu sira no fundu autonomus;

La iha justifikasaun ba situasaun ezekusaun ne’ebé ki’ik  ba reseitas no despezas ka dotasaun ne’ ebé hotu ona; La iha informasaun sobre ativu e passivu estadu nian; La iha informasaun kona-ba emprestimus ne’ ebé estadu halo ba tinan 2017; La iha sertidaun levantamentu osan hosi fundu minarai iha 2017 no mos informasaun sobre desempenho fundu ne’e nian durante tinan ne’ e nia laran;

La iha Sertifikasaun sira ba levantamentu Fundu minarai iha 2017 no informasaun kona-ba dezempeñu fundu nian durante 2017; La iha Sertifikasaun validade hosi Banco Central sobre Fluxus/ cash flow hosi kaixa konta tesouro no fundus especiais (fundu infraestrutura ho fundu capital humano) ;

La iha Informasaun kona-ba kumprimento limite 20% altersaun orsamentu ba servisus ne’ebé la iha autonomia administrativa no financeira; La iha informasaun sobre percentagem de ajusta directos 10% iha ministériu idak idak;

La iha informasaun detalhada ba despezas ne’ ebé selu ho rezerva de kontigensia hodi dotasaun todo governu; La iha indikasaun ba proporsaun financiamento hosi a) Osan (dinheiro publico) ne’ ebé la atribuidu ne’ ebé tama iha fundu konsolidadu Timor Leste 2017; b) Reseita ne’ ebé atu simu iha futuru; c) osan (dinheiro publico) ne’ ebé atribuidu maibe kancela hosi parte dotasaun no orsamental.

Hatán ba mosaun sensura ne’ebé mak AMP aprezenta deputadu bankada Fretilín, Antonino Bianco konsidera  “Asaltu Podér”

Nune’e mós Deputadu Partidu Demokrátiku Luis M Ribeiro konsidera mosaun sensura halo bainhira governu la ezekuta programa tuir saida mak sira aprezenta iha PN.

Nia dehan deputadu sira AMP la bele interpreta konstituisaun tuir nia hakarak de’it. Husu atu jurista mak halo interpretasaun konstituisaun ne’ebé mak loloos.

“Hotu-hotu tuir hakarak sei halakon estatutu soberanu, la bele halo tuir grupu no ida-idak nia hakarak,” Luis lamenta.

Iha parte seluk tuir Artigu 111 (Mosaun sensura nian) haktuir katak; 1) Ho inisiativa baluk-haat ida ¼ deputadu ne’ebé sei hala’o hela knaar, Parlamentu Nasionál bele halo votu sensura ida ba Governu, kona-ba nia programa eh buat seluk ne’ebé relevante ba interese nasionál. 2) Mosaun sensura la hetan apoiu karik, sira-ne’ebé asina mosaun ne’e  labele aprezenta fali mosaun seluk, iha sesaun ne’ebé la’o daudaun.

(Jornalista: Julia Chatarina)

(Editór : Manuel Pinto)

HUSIK IDA HATÁN