Alkatiri Prontu Diálogu ho Xanana no Taur

0
387
Primeiru Ministru, Marí Alkatiri, Prezidente Repúblika, Francisco Guterres Lú Olo bainhira partisipa kongresu daruak komité 12 Novembru ne'ebé hala'o iha Sentru Konvensaun Dili, ohin. Foto António Goncalves

DILI, (TATOLI) – Primeiru Ministru, Marí Alkatiri, hateten prontu atu hala’o diálogu ho líder nasionál hanesan Xanana Gusmão no Taur Matan Ruak hodi buka konsensu ba polítika ne’ebé akontese iha rai laran.

ʺHa’u konkorda katak ami jerasaun 74 no 75 buka atu hamutuk desde uluk kedas, krize 2006 to’o ohin loron ha’u aprende katak demokrasia la’ós ita atu fahe maluʺ, Xefe Ezekutivu durante kongresu Komite 12 Novembru ba daruak iha Sentru Konvensaun Dili (CCD-sigla portugés), ohin.

Nia hatutan, prontu diálogu hodi hetan intendementu ba problema ne’ebé akontese hodi lori dezenvolvimentu ba povu.

“Ezijensia atu ami hasoru malu, no ami nia dalan maka tenke hasoru malu duni no laiha dalan seluk, tanba ne’e lalika laran taridu  hodi  garante nafatin  pás no estabilidadeʺ, tenik.

Situasaun polítika ne’ebé akontese oras ne’e, Alkatiri konsidera provizoriu de’it, tanba sei rezolve iha tempu badak. Povu tenke moris nafatin iha dame no estabilidade.

ʺHau prontu atu ko’alia, ha’u prontu hetan intendementu, tanba ne’e misaun ida ne’ebé entrega mai ha’u atu hala’o bainhira ema hotu kontente atu lori ba di’akʺ.

Demokrasia, nia katak, fó liberdade ba ema ida-ida atu forma opiniaun ba povu nia moris di’ak. ʺHa’u prontu atu ko’alia bainhira hotu-hotu prontu atu simu desizaun saida de’it maka povu ne’e hakarakʺ, afirma.

Alkatiri apresia ho povu  ninia maturidade polítika oras ne’e, maske líder sira iha diferensa hanoin maibé nafatin garante dame no estabilidade.

Jornalista: Agapito dos Santos

Editora: Rita Almeida

HUSIK IDA HATÁN