Alkatiri Konsidera “The Australian Business Review” Públika Fake News

0
552

DILI (TATOLI)—Primeiru Ministru sétimu Governu konstitusionál, Mari Alkatiri rekuza reportajen The Australian Business Review kona ba deklarasaun Primeiru Ministru iha Perth-Australia ba notísia ho títulu “Sunrise hopes rise as talks begin”, no konsidera notisia falsu (Fake News) ne’ebé hakerek husi jornalista Paul Garvey.

Primeiru-Ministru hatete katak reportajen ne’e laiha fundamentu no publika laloos kona ba saida maka Primeiru-Ministru hatete ba jornalista no dook husi ninia kontestu.

“VII Governu Konstitusionál sempre réafirma ninia pozisaun kona-ba kestaun fronteira Marítima. Iha ha’u nia diskursu iha Primeiru Ministru Malcolm Turnbull nia oin rasik ha’u hatete katak Timor-Leste tomak, husi Gabinete Prezidente da Repúblika to’o iha aldeia ki’ik-oan liu iha foho, hotu-hotu hamutuk ho objetivu ida de’it no apoia inkondisionálmente esforsu xefe negosiadór Kay rala Xanana Gusmão nian,” Primeiru-Ministru haktuir iha komunikadu ne’ebé fó sai hosi Gabinete Primeiru Ministru, Tersa (07/11).

The Australian Business Review, publikadu iha loron 6 fulan Novembru tinan 2017, ho títulu ho lian inglés “Sunrise hopes rise as talks begin”, husi jornalista Paul Garvey, atribui deklarasaun ida ba Primeiru-Ministru Dr. Marí Alkatiri hodi hatete “Dr. Alkatiri sujere katak [Timor-Leste] preparadu atu tetu se gás husi Greater Sunrise bele ba prosesa iha Austrália hodi nune’e bele ultrapasa impasse[.]”

 Responde ba artigu ida ne’e, Primeiru-Ministru hatete katak reportajen ne’e laiha fundamentu no publika laloos kona ba saida maka Primeiru-Ministru hatete ba jornalista no dook husi ninia kontestu.

Durante ninia (Alkatiri) estadia iha Australia, Primeiru Ministru hasoru malu mós ho parseiru sira ne’ebé dezenvolve gazodutu iha Tasi Timor no esplika, “ha’u hatete ba ita-nia parseiru sira katak, Xanana Gusmão mak sei negósiu ho sira kona-ba gazodutu ne’e, i klaru, ita mantein firme iha ita-nia pozisaun katak gazodutu ne’e tenke dada mai Timor-Leste.”

 Ko’alia durante konferénsia imprensa iha aeroportu Presidente Nicolau Lobato, bainhira fila hikas husi vizita ba Australia, Primeiru Ministru hatete ba jornalista sira katak iha loron-07 fulan-Novembru, Xefe Negosiador Timor-Leste nian sei hasoru malu ho parseiru sira iha Australia hodi ko’alia kona ba dezenvolvimentu kampu Greater Sunrise no mós katak Primeiru Ministru depozita ninia konfiansa no apoiu tomak iha Sr. Kay rala Xanana Gusmao iha negosiasaun ho parseiru sira.

Ho instrusaun husi Primeiru-Ministru, Gabinete Primeiru-Ministru mós prepara ona karta ida ba jornál The Australian hodi husu atu jornál ne’e imediatamente retifika publikasaun laloos ne’e.

(Jornalista : Agapito dos Santos)

(Editór : Manuel Pinto)

HUSIK IDA HATÁN