Alkatiri Husu Xanana Fila Mai Timor

0
1130
Primeiru-Ministru, Marí Alkatiri, ko'alia ba jornalista sira hafoin hasoru Prezidente Repúblika, Francisco Guterres Lú Olo, iha Palásiu Prezidente Nicolau Lobato Bairo Pité, ohin. Foto mídia PR

DILI, (TATOLI) – Primeiru-Ministru, Marí Alkatiri, husu ba Prezidente partidu Kongresu Nasionál Rekonstrusaun Timor (CNRT-sigla portugés), Kay Rala Xanana Gusmão, atu fila mai Timor nune’e túr hamutuk hodi rezolve tensaun polítika ne’ebé akontese.

Atuál Sekretáriu Jerál Frente Revolusionaria Timor-Leste Independente (FRETILIN) hatete palku polítiku ne’ebé akontese sei impede prosesu dezenvolvimentu.

“Líder hothotu tenke fila mai rai ida ne’e para ko’alia ba malu la’ós ba fali rai seluk haruka ordem maiʺ, dehan Xefe Governu ba jornalista sira hafoin halo enkontru semenál ho Prezidente Repúblika, Francisco Guterres Lú Olo, iha Palásiu Prezidensiál Bairo Pité, ohin..

Xefe Ezekutivu sente triste ho desizaun Xanana Gusmão ne’ebé to’o ohin seidauk deside fila mai TL.

Mesmu nune’e, Marí Alkatiri afirma sei kontinua hein presenza Xanana Gusmão hodi rezolve  tensaun polítika iha rai laran.

Kona-ba mosaun sensura ne’ebé aprejenta hosi Bloku Oposizaun Aliansa Maioria Parlamentár, Alkatiri hateten nu’udar Xefe Governu sei kumpri atu hatan iha uma fukun.

Maibé, to’o oras ne’e nia rasik seidauk simu karta ofisiál husi Prezidente Parlamentu Nasionál relasiona ho mosaun sensura.

ʺHa’u simu ha’u sei tuir rejimentu bolu Primeiru-Ministru atu ba parlamentu no ha’u sei hateten bainhira maka ha’u sei ba, maibé agora ha’u seidauk simuʺ, informa.

Jornalista: Agapito dos Santos

Editora: Rita Almeida

HUSIK IDA HATÁN