COVALIMA (TATOLI)-Komunidade iha Suai-Covalima, aldeia haat nolu resin sia (49), tau ona ai-riin eletrisidade, balun dada ona fiu maibé ahi eletrisidade seidauk lakan.
Dadus informasaun ne´e fó sai husi administradór Munisípiu Covalima, Fernando Nogueira Nahak, iha fim-de-semana ne´e ba profisionál komunikasaun sosiál sira, iha Munisípiu Covalima.
Nia informa katak komunidade aldeia 49 ne´e nia ahi eletrisidade seidauk lakan tanba deskonfia iha “istóri malu” entre “maun-boot” sira ne´ebé kaer serbisu instalasaun eletrisidade.
“Hein katak governasaun foun, revé fali buat sira ne´e oinsá mak atu bele ahi ne´e lori ba to´o iha ami-nia aldeia 49 ne´ebé mak seidauk asesu ba eletrisidade,” espera administradór ne´e.
Nia mós relata katak jeralmente komunidade Suai-Covalima iha ona eletrisidade. “Tuir ami-nia dadus ita bele dehan katak oitenta pursentu komunidade Covalima ne´e asesu ona eletrisidade,” nia informa.
Ministru Adjuntu Primeiru-ministru, José Reis dehan katak populasaun sira ne´ebé seidauk asesu eletrisidade, antes ne´e, governu konstitusionál da-neen halo ona alternativa hodi fó enerjia solár, maske sei nafatin iha problema.
“Tanba ne´e ha´u dehan katak governu mai, fó kontinuidade ba ida ne´ebé mak seidauk kumpletu. Ita-nia objetivu oinsá mak timoroan hotu-hotu, uma ida-idak iha Timor-Leste bele hetan ahi, bele hetan bee mós,” governante ne´e hateten.
Nia hatutan, governu hirak ne´ebé mai, iha obrigasaun atu bele hala´o hotu. “Kumpleta buat ne´ebé mak seidauk iha, hadi´a buat ne´ebé mak ladi´ak i mós harii buat ne´ebé mak seidauk iha, tenta atu harii atu bele fó benefísiu ba iha populasaun,” nia konklui.
(Jornalista: Rafy Belo)
(Editór : Manuel Pinto)
