Aban, PR Sei Halo Dialog Ho PM Alkatiri Ho Taur

0
428
Xefe Estadu Lú Olo no Prezidente PLP, Taur Matan Ruak. Imajen espesiál.

DILI (TATOLI)—Prezidente Repúblika Francisco Guterres Lú-Olo, aban, 15 Novembru,  sei halo diálogu ho Sekretáriu Jerál FRETILIN Mari Alkatiri  no Prezidente Partidu Libertasaun Popular (PLP), Taur Matan Ruak, iha Palásiu Prezidente Nicolau Lobato.

Tuir informasaun ofisiál ne’ebé Ajénsia TATOLI asesu hosi Mídia Palásiu Prezidénsia Repúblika iha Tersa ne’e katak Xefe Estadu sei hasoru lider nain rua ne’e ho oras ne’ebé mak keta-ketak.

Prezidente Lú Olo sei hasoru Sekretáriu Jerál Partidu Fretilín, iha dadeer tuku 09:00. Hafoin loro kraik Prezidente sei kontinua dialog ho Prezidente PLP, Taur Matan Ruak.

Entretantu, enkontru ho Prezidente Partidu Congresso Nacional da Reconstruçao de Timor (CNRT), Xanana Gusmão, ne’ebé tuir planu sei halo mós iha loron hanesan, sei adia ba loron seluk, tanba Xanana Gusmão sei iha hela rai liur hodi trata asuntu sira relasionadu ho Delimitasaun Fronteira Marítima entre Timor-Leste  ho Austrália.

Prezidente Repúblika halo diálogu ho líder istóriku na’in-tolu atu buka solusaun ba problema polítiku ne’ebé mosu hafoin Partidu Opozisaun rejeita programa VII Governu Konstitusionál iha Parlamentu Nasionál.

Prezidente Repúblika foti inisiativa ne’e nu’udar kontinuasaun hosi diálogu sira ne’ebé hahú tiha ona ho líder partidu polítiku sira iha prosesu ba kampaña eleisaun Parlamentár no formasaun Governu hafoin Tribunál Rekursu anúnsia rezultadu eleisaun Parlamentár.

(Jornalista: Xisto Freitas)

(Editór : Manuel Pinto)

HUSIK IDA HATÁN