iklan

NASIONÁL, EDUKASAUN, DILI

Eleva Kualidade Ensinu, MEK Sei Realiza Semináriu

Eleva Kualidade Ensinu, MEK Sei Realiza Semináriu

Foto Espesial.

DILI (TATOLI) – Ministériu Edukasaun no Kultura (MEK) sei realiza semináriu nasionál ho oradór internasionál sira iha aban hodi eleva kualidade ensinu superior iha Timor-Leste.

Ministru Edukasaun no Kultura, Fernando Hanjam dehan, oradór ba semináriu ne’e sei mai hosi nasaun sira hanesan Portugal ho Malaysia.

“Semináriu nasionál importante no hetan prezensa hosi oradór rai li’ur hanesan Portugal no Malaysia iha Kuarta-feira-aban,” Ministru Fernando Hanjam informa ba jornalista sira hafoin hasoru malu ho Primeiru Ministru, Mari Alkatiri iha Palásiu Governu, ohin.

”Ha’u mai atu re-informa de’it kona-ba semináriu aban nian ba Xefe Governu, Mari Alkatiri tanba atividade ne’e realiza hosi Ministériu Edukasaun no Kultura (MEK) hosi Diresaun Ensinu Superiór.”

Semináriu ne’ebé mak sei realiza durante loron rua 22-23, iha edifísiu Ministériu Planu no Finansas  konsentra liu oinsá atu eleva kualidade ensinu superiór sira iha Timor-Leste.

“Kualidade ensinu importante atu ba futuru estudante sira kuandu remata estudu sira buka servisu fasil duké akaba eskola maibé la iha kualidade hodi rezulta la hetan servisu.” Hanjam esplika tan.

Hodi dehan Ita tenke hadi’a ensinu superiór atu ba futuru sira ba kompete iha momentu saida de’it sira bele hetan lalais servisu.

Entretantu partisipante ba semináriu ne’e mak estudante sira universitáriu hotu iha Timor-Leste.

(Jornalista : Zezito Silva)

(Editór : Manuel Pinto)

iklan
iklan

Leave a Reply

iklan
error: Content is protected !!