Xefe Suku Sira Hato’o Preokupasaun Ba Xefe Estadu

0
253
Portavóz Forum Lideransa Komunitária ne’ebé hanesan Xefe Suku Lahane Orientál, Postu Administrativu Nain Feto, Munisípiu Dili, Trindade do Amaral Pinto Baptista, kaer liman ho Xefe Estadu iha soru-mutu ne'ebé hala'o iha Palásiu Prezidente Nicolau Lobato. Imajen mídia Palásiu PR.

DILI, (TATOLI) – Reprezentante Forum Lideransa Komunitária (FLK) kompostu xefe suku sira hosi munisípiu Dili hala’o enkontru ho Prezidente Repúblika, Francisco Guterres Lú Olo, hodi ko’alia kona-ba difikuldade ne’ebé xefe suku sira enfrenta iha sira nia kna’ar lor-loron.

Forum Lideransa Komunitária bainhira hasai foto hamutuk ho Xefe Estadu iha Palásiu Prezidente Nicolau Lobato. Imajen mídia Palásiu PR.

Portavóz FLK hanesan Xefe Suku Lahane Orientál, Postu Administrativu Nain Feto, Trindade do Amaral Pinto Baptista hatete difikuldade ne’ebé sira hasoru maka Lei Suku Nú. 9/2016 iha artigu 80 ne’ebé define kompeténsia tomak atu halo reseita ka kobransa tuir lei ne’ebé define, maibé akontese la fó espasu ba autoridade lokál sira ezekuta kompeténsia.

Aleinde ne’e, nia hatutan, sistema konsiderasaun ba Lei Suku la loos tiha ona tanba ku’a direitu insentivu hosi xefe suku antigu sira ba xefe suku foun ne’ebé ofisialmente eleitu iha 1 dezembru 2016.

Nune’e mós, Baptista informa, Governu la konsidera delegadu no delegada suku ne’ebé eleitu direta hosi povu, tanba sira hetan de’it direitu insentivu kada fulan neen liuhusi enkontru ho montante $45,00. Relasiona ho ida ne’e, nia haktuir, delegadu no delegada sira lakohi halo serbisu.

“Ne’e ami konsidera katak diskriminasaun boot ne’ebé maka Governu halo ba autoridade lokál sira. Ami husu ba Prezidente Repúblika atu hatutan ami nia aspirasaun ba governu”, eis jornalista ne’e ba jornalista sira iha Palásiu Prezidente Nicolau Lobato, Bairru Pité, tersa ne’e, hafoin soru-mutu ho Xefe Estadu Lú Olo.

Iha biban ne’e, Xefe Estadu, Francisco Guterres Lú Olo dehan nia sei hato’o ba Governu, kuandu hala’o enkontru ho reprezentante Governu iha tempu oin mai.

Jornalista: Xisto Freitas

Editora: Rita Almeida

HUSIK IDA HATÁN