Xanana Hakarak Manan Esperénsia Nu’udar Opozisaun

0
175
Kay Rala Xanana Gusmão

DILI, (TATOLI) – Fundadór no lideransa másimu partidu Kongresu Nasionál Rekonstrusaun Timor (CNRT-sigla portugés), Kay Rala Xanana Gusmão kontinua ho lia-fuan hanesan katak partidu CNRT kontinua sai opozisaun hodi hetan esperénsia.

“Ami deside hakarak sai opozisaun hodi iha mós tempu sufisiente, implementa programa formasaun ba kuadru partidu para iha preparasaun no hetan esperiénsia nu’udar opozisaun”, hateten Xanana Gusmão ba profisionál komunikasaun sosiál iha Funchal Madeira Portugal, foin lalais ne’e.

Deklarasaun ne’e fó sai, tanba tuir nia, hafoin apuramentu nasionál rezultadu eleisaun lejislativa no hetan lejitimu husi Tribunál Rekursu (TR), partidu CNRT realiza konferénsia nasionál hodi deside sai nu’udar opozisaun.

“Tanba agora ami lakon, ami hateten hanesan ne’e; ita hanoin, ita hadi’a ita-nia kapasidade hodi manan, se hakarak nafatin partisipa iha jogu demokrasia”, akresenta hodi fó sai pozisaun CNRT kona-ba programa governu da-hitu ne’ebé lidera husi koligasaun Frente Revolusionaria Timor-Leste Indepéndente (FRETILIN) ho Partidu Demokrátiku (PD).

Oras ne’e dadaun, Kay Rala Xanana Gusmão iha hela estranjeiru, fulan rua resin ona hodi hala’o atividade ne’ebé ligadu ho fronteira marítima. Tan ne’e, nia parte agradese ba partidu sira hotu ne’ebé fó fiar ba nia hodi halo defeza ba interese nasionál.

Entretantu, antes ne’e partidu CNRT, Partidu Libertasaun Populár (PLP) no Kmanek Haburas Unidade Timor Oan (KHUNTO) deklara atu sai alternativu, karik governu da-hitu monu.

Partidu tolu ne’e oras ne’e dadaun, CNRT nia reprezentante deputadu na’in 22, PLP kadeira ualu no KHUNTO kadeira lima.

Dadaun ne’e, deputadu sira kontinua debate programa governu ne’ebé aprejenta hosi Primeiru Ministru, Marí Alkatiri ho ninia estrutura. (*)

HUSIK IDA HATÁN