UNDP Sei Apoiu Tan Komunikasaun Sosiál Timor-Leste

0
207

DILI (TATOLI)-UNDP (United Nation Development Program) sei apoiu tan komunikasaun sosiál Timor-Leste hodi hasa’e liutan kualidade no prestasaun servisu media.

Xefe Konselleiru Tékniku UNDP, Andres Del Castillo informa katak sira hahú fila fali atu serbisu programa kooperasaun nasaun unida nian ho Sekretáriu Estadu Konsellu Ministru no Komunikasaun Sosiál iha área komunikasaun no media.

“Projetu ida  ne’ebé mak halo husi governu Japaun nian, projetu ne’ebé mak nia andamentu la’o ona iha tinan kotuk” informa xefe konselleiru Andres del Castillo ba Ajénsia Tatoli, iha Palásiu Governu, kinta (12/10).

UNDP tinan ne’e mai tan dala ida hodi kontinua programa ne’e nafatin ho Sekretáriu Estadu Konsellu Ministru no Komunikasaun Sosiál atuál.

“Agora ami tenta hodi kontinua to’o ba tinan oin hodi iha atividade hamutuk ho SEKOMS espesialmente ho rádiu komunidade, institutu formasaun jornalista,” nia hatutan.

“Ami diskute dadaun hela, hein katak bele konkretiza” hatan xefe konselleiru Andres del Castillo bainhira husu kona-ba UNDP nia disponibilidade hodi haruka formadór sira hodi fasilita rekursu umanu media Timor-Leste.

Sekretáriu Estadu Konsellu Ministru no Komunikasaun Sosiál, Matias Freitas Boavida informa katak  projetu ne’e nu’udar kontinuasaun husi buat ne’ebé SEKOMS (Sekretáriu Estadu Komunikasaun Sosiál) anteriór halo tiha ona.

Projetu ne’e iha dezde mandatu sekretáriu estadu sesante Nélio Isaac Sarmento, iha governu konstitusionál da-neen.

“Tanba ha’u mai hala’o mós nia hanoin no hakarak entaun, UNDP mai, primeira coisa ne’ebé mak ami halo mak oinsa atu hand over (entrega) ekipamentu ne’ebé mak parte UNDP prepara hamutuk ho embaixada Japaun nian,” informa sekretáriu estadu, Matias Boavida.

Segundu pontu ne’ebé mak iha mak oinsa husi parte UNDP nian fó apoiu, atu halo rehabilitasaun ba sala konferénsia imprensa, ne’ebé lokaliza iha Palásiu Governu, besik mós redasaun Ajénsia Tatoli nian.

“UNDP haree atu apoiu hodi halo rehabilitasaun ba ita-nia sala ne’e,” informa tan sekretáriu estadu ne’e.

Terseiru pontu mak parte Sekretáriu Estadu Konsellu Ministru no Komunikasaun Sosiál hato’o proposta ba UNDP atu fasilita formasaun ba jornalista sira, ‘kaneta na’in’ sira iha Timor-Leste hodi bele iha liutan kualidade liliu sai jornalista ne’ebé kreativu, sai jornalista ne’ebé investigativu, sai jornalista sira ne’ebé forte.

“Entaun, sira disponível atu apoia liuhusi sentru formasaun ne’ebé ita iha (CEFTEC-Centro Formação Técnica em Comunicação), oinsa UNDP haree di’ak liutan sá modelu formasaun, saida mak sira bele fó ba ita nune’e ita bele hakbiit liutan ita-nia jornalista sira. No fim, ita bele sai jornalista ne’ebé forte no hakbiit liutan kualidade,” nia konklui.

Entretantu vizita ne’ebé UNDP halo mai Sekretáriu Estadu Konsellu Ministru no Komunikasaun Sosiál, objetivu ida mak hato’o mós sira-nia felisitasaun lider másimu sekretáriu estadu ne’e ho estrutura tomak.

(Jornalista: Rafy Belo)

(Editór : Manuel Pinto)

HUSIK IDA HATÁN