Uma ba Sidadaun Kolmera Refleta Misaun Quesadhip Ruak

0
44
Miguel Maia dos Santos. Foto: Sentru Quesadhip Ruak

DILI, (TATOLI) – Prezidente Konsellu Administrativu Sentru Quesadhip Ruak, Miguel Maia dos Santos hatete Uma Sidadania Kolmera refleta ba vizaun no misaun Sentru Quesadhip Ruak nian mak sei lori sidadaun sira, hahú husi labarik to’o adultu hodi iha kualidade atu hetan pás.

“Bainhira ita-nia sidadaun hotu ho nível matenek ne’ebé mak di’ak, kualititivu aas ita hetan pás tanba pás mai husi ema ida-idak nia laran”, hatutan Prezidente Administrativu, Miguel Maia dos Santos ba jornalista sira hafoin inagura “Casa da Cidadania de Colmera,” ne’ebé lokaliza iha Aldeia Manufuik Kolmera, tersa, (10/10).

Nia esplika, Sentru Quesadhip Ruak bazea ba objetivu, vizaun no misaun iha atividade sanulu ne’ebé mak hatuur tiha ona sentru ne’e.

Atividade sira ne’e mak reforsa ka hakbiit papel sidadaun nian iha konstrusaun no dezenvolvimentu país nian ne’ebé hahú ba artigu 6 konstituisaun RDTL (Repúblika Demokrátika de Timor-Leste).

Dezenvolve atividade sira iha área koñesimentu, artezenatu no atividade sira komunitáriu ninian, refleta mós família sira nian.

Muda komportamentu sidadaun sira nian ho karakter ne’ebé pozitivu, moral, étiku no relijiozu maibé refleta ba pro-ativu iha atividade no formasaun oin-oin.

Hakbesik aan ba jestaun oin-oin, konsolida pás, sosiál liuhusi hahalok di’ak ka konstrutivu, espiritu voluntarizmu, solidáriu no tolerante. Enkoraja espiritu kreatividade, inovasaun no kumpridora.

“Atividade sanulu ne’ebé hatuur tiha ona no sei hala’o mak administrasaun, advokasia, informátika, leitura bibilioteka”, informa tan.

Nia akresenta, atividade leitura halo labarik sira matenek lalais, jogu oin-oin halo labarik sira oinsa bele ánima labarik sira hodi lori ba orizonte kreatividade nian. Arte, múzika, kontu, kantu, pintura no seluk tan nomós kintál komunitáriu. “Atividade sanulu ne’e hatuur nu’udar program aba kurtu prazu (tempu badak)”, reforsa.

Nia realsa, Sentru Quesadhip Ruak liuhusi “Casa da Cidadania de Colmera” la la’o mesak, maibé hetan husi apoiu husi doadór interesadu sira.

Balun apoiu morál, spirituál nomós materiál. “Ne’e tinan rua liubá, ohin ita bele inagura”, haktuir.

Miguel Maia esplika vantajen husi  uma sidadania mak forma timoroan ne’ebé ho fundamentu, aliserse iha edukasaun ne’ebé forte.

“Edukasaun formál seidauk bele absorve hotu-hotu, atividade formál sira iha eskola maibé dalaruma tempu ba sira la to’o, entaun aproveita tempu, mai halo formasaun iha Casa da Cidadania de Colmera”, haktuir.

Formadór sira ba atividade sira mak parte interesadu sira, péritu ne’ebé iha talentu atu bele halo formasaun.

“Sira ne’e mai husi fatin hotu-hotu; eskola, instituisaun relijioza sira, formasaun ne’e atu bele iha esforsu ida atu bele rekoñese iha nivel internasionál”, haktuir tan.

Orsamentu mai husi fundadór , doadór no futuru sei kria atividade sustentável. “Ita labele garante de’it husi governu, oinsá mak ita bele lori casa cidadania no atividade sentru Quesadhip Ruak ne’e bele sustenta to’o tempu naruk”, nia konklui.

Entretantu, uma ba sidadaun ne’e harii no inagura tan hetan apoiu husi Empreza Fu Xin Lda, Timor Telecom, organizasaun sosiedade sívil husi Portugal no Indonézia, ONG Hiam Health nomós entidade sira seluk tan.

Sentru ne’e inagura husi eis-prezidente repúblika, Taur Matan Ruak no akompaña husi Padre David Alves da Conceição.

Partisipa iha inagurasaun ne’e mak membru governu konstitusionál da-hitu, mambru parlamentu nasionál lejislatura da-haat, korpu diplómatiku, autoridade seguransa hanesan Polísia Nasionál Timor Lorosa’e (PNTL) no FALINTIL-FDTL (Força da Defesa de Timor-Leste), sosiedade sívil, komunidade no seluk.

Jornalista: Rafy Belo

Editora: Rita Almeida

HUSIK IDA HATÁN