UA Enkaixa Atividade Lúdika iha atividade “English For Kids”

0
80
Foto ilustrasaun

DILI (TATOLI)-Uma Amérika (UA) enkaixa mós atividade lúdika ba labarik sira alende aprende inglés iha atividade “English For Kids” ka inglés ba labarik sira.

“Ita komesa husi ida báziku nia tebes. Ita komesa husi conversation (dada-lia). Agora ita tama ona iha human body (ema nia isin-lolon). Voluntáriu sira mós enkaisa game (jogu) ne’ebé iha relasaun ho tópiku ne’ebé mak sira fó,” informa jestór UA, Ezaquiel Ribeiro ba ajénsia Tatoli, iha UA, kampus Ekonomia, Universidade Nasionál Timor Lorosa’e (UNTL), segunda (09/10).

Game ho lian inglés,” jestór Ezaquiel Ribeiro reforsa tan. Nia hatutan, UA kontente tebes tanba inan-aman sira mós simu no orgullu ho atividade UA nian ne’ebé oferese ba labarik sira. “Inan-aman sira-nia orgullu valoriza tebes ami-nia serbisu,” akresenta jestór Ezaquiel.

Nia informa, inan-aman husi labarik sira mós mai hasoru nia hodi husu atu UA bele enkaisa tan programa seluk alende jogu nomós atividade inglés ba labarik sira.“Ha’u ko’alia ba sira katak ita la’o neneik tanba ita tenke la’o tuir planu,” reforsa jestór UA, Ezaquiel Ribeiro.

Ita labele mai, hanoin buat ruma iha ita-nia kakutak depois tau maibé tuir planu ne’ebé iha. “Ami-nia limitasaun mak fatin,” nia relata.

Nia dehan, labarik ne’ebé agora mai tuir atividade “English For Kids” ne’e nia númeru aumenta tanba ne’e sira hanoin ona atu oinsa fahe klase ne’e ba rua.

Ba adultu sira uza espasu interior UA nian no labarik sira nian alende uza espasu interiór aproveita uza mós jardin UA nian.

“Labarik sira ne’e importante ba sira ne’e mak game ne’e. Ema boot sira liliu sira ne’ebé mak eskola tiha ona iha pré-sekundária, game ne’e sira laduun interese,” nia haktuir.

Ho situasaun ida ne’e UA hanoin atu ba nia atividade sira ba iha grupu rua, grupu labarik ho adulsente sira.“Voluntáriu sira mak prepara fasilidade sira. Game sira ne’e, dalaruma labarik sira halo peskiza iha American English website,” nia relata.

Website ka portál ida ne’e mak UA uza hodi suporta sira-nia programa, embixada Estadu Unidu Amérika (EUA) mak apoia.

Entretantu, atividade no kurikúlu ne’ebé utiliza dezenvolve rasik husi UA hamutuk ho embaixada Estadu Unidu Amérika (EUA) nian, iha Díli, Timor-Leste.

Voluntáriu sir aba atividade UA nian hamutuk na’in 14, mai husi Universidade Nasionál Timor Lorosa’e (UNTL) inklui ensinu superiór sira seluk iha Timor-Leste liliu husi Departamentu Inglés.

 (Jornalista: Rafy Belo)

(Editór : Manuel Pinto)

 

HUSIK IDA HATÁN