TL Sei Sai Uma ba Nain Enkontru Jerál PJR CPLP XV

0
86
Comunidade País da Língua Portuguesa. Foto Espesial

DILI, (TATOLI) – Timor-Leste (TL) sei sai uma nain ba enkontru jerál Prokudoria Jerál Repúblika (PJR) komunidade nasaun sira ne’ebé ko’alia lian portugés (CPLP – Comunidade Países da Língua Portuguesa) XV ne’ebé organiza husi PJR-TL iha loron 25 to’o 27 outubru iha Dili.

Tuir PJR-TL, José da Costa, TL hanesan uma nain ba eventu ne’e no sei simu bainaka husi Angola, Brazíl, GuinéBissau, Cabo-Verde, rejiaun administrativa espesiál Macau (Xina), Mozambique, Portugal, no São Tomé e Prínsipe.

“Enkontru ne’e hanesan oportunidade no previléjiu boot ida ba Prokudoria Jerál Repúblika Timor-Leste nian atu partilla esperiénsia hodi haree ba relasaun institusionál no kooperasaun jurídika internasionál entre membru komunidade internasionál, liu-liu iha ámbitu CPLP”, tenik José da Costa iha komunikadu ida ne’ebé ajénsia Tatoli asesu, ohin.

Objetivu husi enkontru ne’e, koordena asaun kooperasaun jurídiku Ministériu Públiku hodi haree modalidade instrumentu oin-oin no hala’o kompeténsia atu promove no dezenvolve relasaun entre membru jurídika sira, troka hanoin no fó informasaun ba malu hodi haree ba problema ne’ebé mak mosu hodi halo reflesaun no hamosu hanoin hamutuk atu hadi’a sistema jurídiku.

Tópiku sentrál ba enkontru ne’e mak Ministériu Público e os desafios da Globalisação no tópiku balun ne’ebé sei aprezenta hanesan violência baseada no género: Prevenção, repressão e proteção às vítimas, Investigação criminal, desconsentração de competência edireção do inquérito/instrução, A “desterritorialização” das atividades criminosas e o problema da efetividade da cooperação internacional investigatória no mekanizmu oin-oin ne’ebé nesesáriu hodi eleva kooperasaun jurídika iha espasu CPLP nian.

Enkontru ne’e sei inklui mós asinatura ba Deklarasaun Dili no asinatura memorandu entre PJR CPLP nian.

PJR husi Indonézia sei marka prezensa no sai hanesan observadór tanba razaun PJR Giné Ekotoriál sei la mai iha eventu ne’e.

Tuir ajenda, Prezidente Parlamentu Nasionál, Aniceto Guterres sei halo abertura ofisiál no enserramentu enkontru jeral PJR CPLP XV ne’e.

TL promove ona atividade oin-oin hodi eleva kooperasaun jurídika iha área Ministériu Públiku iha ámbitu CPLP. Pontu Kulminante husi atividade hirak ne’e mak organiza enkontru jerál anuál ba CPLP XV.

PJR-TL rasik iha enkontru PJR CPLP XIV nian ne’ebé hala’o iha Lisboa outubru 2016, hetan nomeiasaun hodi sai Prezidente ba PJR CPLP ba tinan 2017.

Jornalista: Julia Chatarina

Editora: Rita Almeida

HUSIK IDA HATÁN