Tinan Ne’e Moras HIV/SIDA Hamutuk 61

0
182

DILI, (TATOLI) – Hahú janeiru to’o setembru 2017, Ministériu Saúde (MS) deskobre tan ema moras HIV/SIDA foun hamutuk nain 61.

“Ita komesa deteta tan kazu foun moras HIV/SIDA hamutuk 61, kazu hirak ne’e barak liu hosi munisípiu Bobonaro, Dili, Suai no Oe-Cusse”, informa Diretór Nasioanál Saúde Públika MS, Pedro Canisio da Costa Amaral ba jornalista sira iha Hotel Novo Turismo, kuarta (25/10).

Nia hatutan, kazu foun hirak ne’e, MS labele relata tanba dadaun ne’e sei halo teste. Totál dadus ne’ebé bazeia ba sistema informasaun saúde hatudu kazu ba ema ne’ebé hetan HIV/SIDA pozitivu, hahú 2003 to’o 2016 hamutuk 689. Hosi kazu hirak ne’e foin hetan tratamentu hamutuk 285 no mate 87.

“Ami fó nafatin tratamentu ba pasiente sira pozitivu HIV/SIDA iha fatin klínika Bairo-Pite no sentru saúde hotu, pasiente HIV/SIDA hirak ne’e barak liu ho idade 25 to’o 44 hamutuk 228”, dehan nia.

Hatutan tan, idade hosi 15 to’o 24 hamutuk 166 pozitivu HIV/SIDA, enkuantu iha mós labarik ho idade tinan lima mai kraik hamutuk nain ualu no mate nain rua ne’ebé haktuir dadus hosi 2009 to’o 2010 tanba dalaruma transmisaun inan ba oan.

“Ita halo teste ba inan isin rua atu bele hatene sira ne’ebé iha ona virus atu nune’e ita bele halo ona tratamentu”, haktuir nia.

Enkuantu, númeru ho stigma diskriminasaun sei a’as tanba ne’e mak la dehan sai katak sé mak iha hela tratamentu nia laran. No labele fó sai klínika ne’ebé mak halo tratamentu.

Entretantu, MS labele implementa mesak programa hirak ne’e maibé presiza parseiru barak atu suporta.

Dezafiu ne’ebé MS hasoru mak atu konvense no sensibiliza informasaun ba komunidade atu muda sira nia hahalok ida ne’e mak presiza tempu naruk.

Maibé kuandu komunidade sira iha ona koñesimentu di’ak, sira bele muda hahalok atu moris saudavél signifika todan ba MS bele menus tanba sira hatene ona oinsá atu prevene moras.

Jornalista: Zezito Silva

Editora: Rita Almeida

HUSIK IDA HATÁN