Situasaun Rai Laran Hakmatek

0
148
Komandante Jerál Polísia Nasionál Timor-Leste (PNTL), Júlio da Costa Hornay ko'alia ba jornalista sira iha Palásiu Prezidente Nicolau Lobato, ohin. Foto Tatoli/Xisto Freitas

DILI, (TATOLI) – Komandante Jerál Polísia Nasionál Timor-Leste (PNTL), Júlio da Costa Hornay hateten provizoriamente situasaun rai laran hakmatek, maske rumor akontese problema iha munisípiu balun impaktu hosi debate programa governu konstitusionál dahituk iha Parlamentu Nasionál hahú hosi 16 to’o 20 outubru.

“Maske iha rumor katak iha munisípiu balun folin nesesidade báziku sa’e tanba impaktu hosi diskusaun programa governu iha Parlamentu Nasionál ne’ebé deputadu sira hatudu oin manas ba malu, maibé realidade situasaun hakmatek”, hatutan Hornay ba jornalista sira iha Palásiu Prezidente Nicolau Lobato, Bairru Pité, kinta ne’e, hafoin levanta situasaun seguransa iha rai laran ba Prezidete Repúblika, Francisco Guterres Lú Olo.

Nia apela ba timoroan hotu-hotu atu lalika tauk no hakfodak ba rumor ne’ebé lansa tanba, polísia serbisu hamutuk ho forsa armada sei asegura kualker problema.

“Polítika ne’e normál. Iha ne’ebé de’it akontese maibé, povu maka tenke hatene án katak ita laiha ligasaun ho ida ne’e (debate programa Governu) duké ita túr hanoin barak, di’ak liu ba halo toos no natar no funsionáriu karik ba halo serbisu tuir kareira”, dehan komisáriu ne’e.

Júlio husu atu husik nai ulun sira iha Parlamentu Nasionál avontade deskuti oinsá atu bele deside futuru nasaun ne’e nian.

“Ami akompaña loron ba loron debate programa iha Parlamentu Nasionál. Ami sei antisipa karik husi debate sira ne’e implika ba atividade ruma ne’ebé halo problema, ami prontu atu atua”, tenik.

Hornay haktuir polísia mós hala’o pasarevista iha Timor laran tomak hodi prevene ema balun hosi munisípiu mai Dili atu kria problema. Maibé, tuir pasarevista, laiha ema ida maka ho intesaun atu halo problema.

Biban ne’e, Prezidente Repúblika orienta Forsa Seguransa no Defeza atu mantein asegura estabilidade no pás iha territóriu tomak para povu bele hakmatek nafatin hodi hala’o sira nia atividade loro-loron.

Jornalista: Xisto Freitas

Editora: Rita Almeida

HUSIK IDA HATÁN