SERVE Sei Aprosima Kompañia Aéreo Hodi Banati Lejislasaun

0
491
Silk Air. Foto/Google.

DILI, (TATOLI) – Servisu Rejistrasaun no Verifikasaun Emprezariál (SERVE), sei halo aprosimasaun ho kompañia aviasaun sivíl rua hanesan Air North no Silk Air atu banati tuir legislasaun iha Timor-Leste.

Diretór Ezekutivu (SERVE), Florêncio Sanches, informa daudaun ne’e SERVE prepara-aan hodi halo aprosimasaun ba kompañia rua ne’e, tanba iha ona esperiénsia ho Citilink ne’ebé hala’o ona atividade komersiál hafoin mak trata dokumentu.

“Tanba Citilink ami kompleta ona, agora ita labele hamosu tan erru iha futuru. Erru ne’ebé iha sai esperiénsia mai ita, entaun SERVE sei utiliza nia kompeténsia tomak tuir lei, sei aprosima kompañia rua ne’e tuir lei ne’ebé ita iha”, Florêncio informa iha Matadoru, horisehik.

Aleinde kompañia aviasaun, iha mós empreza boot sira ne’ebé hala’o atividade ekonómika iha Tasi Timór no SERVE iha planu atu konvida empreza sira ne’e hotu.

“Iha kompañia balun iha finanseira ninian, lei ne’e regula hotu, tanba ne’e SERVE iha ona planu atu halibur sira ne’ebé halo atividade ida ne’e. Ha’u komunika tiha ona Banku Sentrál no konkorda atu bolu Banku Komersiál, sira ne’ebé la’ós banku maibé halo atividade finanseira hanesan seguru, transfere osan sira ne’e, sei mai hotu para hetan informasaun ne’ebé Estadu tau liuhusi lejislasaun ne’ebé ita aplika husi setembru tinan 2017”.

Ho papél ne’ebé SERVE iha mak sei hakbesik ho empreza sira ne’e no laiha planu atu taka sira-nia atividade maibé ezize ba sira atu kumpri lei ne’ebé nasaun ne’e estabelese.

“Iha ona planu atu fó hatene prezidente Aviasaun Sivíl Timor-Leste nian atu fó hatene ba sira ne’ebé halo atividade aéreo nian hodi tuur hamutuk para fó hatene katak lei mak ne’e, imi halo atividade mas kumpri uluk lai lei, ita labele halo tiha mak foin kumpri ne’e, labele”.

Kompañia aéreo ne’e, tuir Florêncio seidauk iha sertidaun rejistu komersiál maibé iha de’it mak rejista ba asuntu tributária.

“Lei hatete tributária mai depois de rejistu komersiál, tanba lei dehan tenke iha sertidaun rejistu komersiál mak bele selu taxa. Agora sira selu taxa signifika tuir sira buat hotu loos maibé la’e. Nia lala’ok hanesan mós sira ne’ebé agora halo negósiu iha Tasi-laran, katak halo tiha rejista tributária nian, sira haluha katak ida ne’e meiu atu hetan, maibé la’ós ida ne’e mak lei husu atu estabelese firma ida iha Timor-Leste, enkuantu iha lei ketak mak Sosiedade Komersiál númeru 10/2017”.

Sobre empreza nasionál ne’ebé iha ikus ne’e sai operadór iha Tasi Timór, sira kumpri lei maibé operadór boot lubun mak seidauk kumpri  lei.

Jornalista: Maria Auxiliadora

Editora: Rita Almeida

HUSIK IDA HATÁN