SERVE Bandu Uza ‘Timor-Leste’ Iha Kompañia

0
217
Diretór SERVE, Florêncio Sanches (faru metan) tuur besik ho Prezidente CCI-TL, Oscar Lima bainhira partisipa iha semináriu iha salaun MSS. Foto/Egas Cristovão.

DILI (TATOLI)— Diretór Ezekutivu SERVE, Florêncio Sanches, husu ba kompañia sira ne’ebé durante ne’e utiliza naran ‘Timor-Leste’ ba sira nia kompañia atu troka tanba Dekretu Lei foun  númeru 16/2017 no númeru 10/2017 ne’ebé regula emprezáriu sira bandu ona atu tau naran kompañia ka firma  sira ho naran Timor-Leste.

“Lei foun ne’ebé Servisu Rejistu no Verifikasaun Emprezariál (SERVE) implementa  ona hahú iha loron 15 Setembru 2017 hatete kompañia hotu ne’ebé uza naran Timor-Leste tenke troka no labele uza ona naran ida ne’e,” Florêncio Sanches aviza iha Matadouru, ohin.

Uluk dekretu lei 35/2012 autoriza atu empreza sira uza naran ne’e bainhira sira rejista, antes dekretu ne’e mosu maibé iha lei foun númeru 16/2017 no númeru 10/2017 dehan katak, mezmu empreza tuan ka foun labele ona uza Timor-Leste ba iha kompañia nia naran.

Tan ida ne’e, husu ba emprezáriu hotu iha rai Timór katak sé imi-nia naran keta iha ona sertidaun sertifikadu hakerek naran Timor-Leste, bele hakat ba SERVE hodi troka.

Basa tuir lei foun ne’e, kompañia ne’ebé rejista dezde tempu UNTAET to’o mai Governu ohin loron, empreza sira ne’ebé uza naran Timor-Leste labele uza ona no sei fó fulan 12 ba empreza sira atu troka naran exeptu empreza públika ne’ebé Governu mak harii.

(Jornalista : Maria Auxiliadora)

(Editór : Manuel Pinto)

HUSIK IDA HATÁN