Saudozo Teki Sei Haloot iha Jardim dos Herois

0
143
Saudozu Teki ho naran kumpletu Agusto Filipe Gama. Foto: Lorico Lian

DILI, (TATOLI) – Saudozu Teki ho naran kumpletu Agusto Filipe Gama nu’udar Joventude Loriku Aswa’in sira ne’ebé militár Indonézia sira oho hafoin akontesimentu Masakre Santa Kruz, 12 Novembru 1991.

Teki moris iha Laga, 16 agostu 1964, fuan domin husi Tai resi no Liba-loi. Teki nu’udar oan daruak husi maun alin na’in neen.

Saudozu hahú tama iha eskola Semináriu Daré iha tinan 1984 maibé la konsege kumpri nia vokasaun tanba ne’e iha tinan 1988 nia kontinua fali nia estudu iha UNTIM (Universitas Timor-Timur), Fakuldade Siénsia Sosiál no Polítika.

Depois akontesementu Masakre Santa Kruz, Teki hanesan Juventude Loriku Aswa’in ne’ebé militár Indonézia sira destera sai husi sidade Dili.

Bazea ba kronolojia, tuir komunikadu ne’ebé ajénsia TATOLI asesu, sesta (20/10) katak primeiru TNI (Tentara Nasional Indonesia) sira lori Saudozu Teki ba kastigu iha Postu Adminsitrativu Natarbora, husi Natarbora sira muda nia ba iha suku Manehat.

Tuir informasaun ne’ebé hato husi lian-nain (Maun Casmiro) katak husi Manu tolun ne’ebé lia na’in ne’e uza, hatudu katak TNI na’in  haat inklui milisia na’in ida mak lori saudozo husi postu TNI (Fatuk Lau Tutun kode 214) ba oho iha fatin ne’ebé nia restu mortál sira hetan ba (Uhak tutun ho kode 219). Área rua ne’e hanesan parte integradu husi suku Manehat.

Militár oho saudozu iha kalan, 31 dezembru 1992, iha tuku 9:40 área ne’ebé mensiona. Saudozu liuliu Komite 12 novembru ho komunidade husi Soibada, Salau, Manehat no Natarbora konsege aruma restu mortál saudozo Teki nian iha fatin ne’ebé temi iha leten.

Restu mortál saudozu Teki nian sei ba haloot iha Jardim dos Herois, Metinaro-Dili, hafoin lori tiha ba nia moris fatin postu administrativu Laga, munisípiu Baucau.

Oráriu husi inísiu to’o tempu atu haloot saudozu nia restu mortál mak família sai husi Dili ba Natarbora iha loron 19/10/2017 (tuku 14:00), sai husi Natarbora ba Laga-Baucau loron 20/10/2017, tuku 10:00.

Depois rai loron 4 iha Laga, loron 25/10/2017 sei lori fila fali husi Laga mai Dili-Bidau (tuku 13:00 meudia).

Loron 28/10/2017, husi uma Bidau sei lori ba vizita UNTL (Universidade Nasionál Timor Lorosa’e). Husi UNTL sei ba vizita Komite 12 novembru.

Loron 29/10/2017 lori saudozo Teki nia restu mortais ba halo’ot iha fatin ikus Jardim dos Herois, Metinaro, tuku 16:00.

Jornalista: Rafy Belo

Editora: Rita Almeida

HUSIK IDA HATÁN