Rejime Greater Sunrise Komplikadu

0
260
Ministru Adjuntu Primeiru-Ministru ba Delimitasaun Fronteira, Hermenegildo Augustu Cabral Pereira bainhira simu pose husi PR, Francisco Guterres “Lú-Olo”. Foto/GPM.

DILI, (TATOLI)-Ministru Adjuntu Primeiru-Ministru ba Delimitasaun Fronteira, Hermenegildo Augustu Cabral Pereira informa, detalla ne’ebé hanaran rejime espesiál ba dezenvolvimentu greater sunrise nian daudaun ne’e sei konsentra hela tanba ne’e la’ós buat ida ne’ebé simples maibé komplikadu.

Nune’e iha loron 9 to’o 13 Outubru, Ministru ho Xefe Negosiadór, Kay Rala Xanana Gusmão sei bá Haia atu haree detalla ne’e.

“Depois bá Haia agora, atu haree detalla ne’e hahú loron 9 to’o 13, ha’u ho maun boot, xefe negosia, ami-na’in rua to’o iha ne’ebá iha dia 7 hodi hahú serbisu ho ita-nia ekipa legál, prepara aan para atu hahú negósiu iha segunda-feira, dia 9,” eis Ministru ba Prezidénsia Konsellu Ministru ne’e hatete ba jornalista sira iha Palásiu Governu, ohin.

Ministru hatutan to’o iha loron 13 Outubru, komisaun sei hasai komunikadu ida hodi hato’o tan detalla prosesu ba mídia sira.

Timor-Leste no Austrália iha loron 30 agostu, hetan ona solusaun liuhusi Prosesu Konsiliasaun Obrigatória ba Fronteira Marítima nian.

Tuir portál Gabinete Fronteira Marítima ne’ebé TATOLI asesu,  konkordánsia ba fronteira Marítima husi nasaun rua ne’e ba kestaun prinsipál, delimitasaun ba fronteira Marítima ida iha Tasi Timór. Parte rua no Komisaun sei formaliza akordu ne’e no buka dalan ba kestaun balun ne’ebé sei iha. To’o rezolve kestaun hirak ne’e hotu, prosesu ne’e sei la’o ho konfidensiál nafatin.

(Jornalista : Maria Auxiliadora)

(Editór : Manuel Pinto)

HUSIK IDA HATÁN