Promove Direitu Labarik, UNICEF Agradese Prezidente Repúblika

0
82
Reprezentante foun United Nations International Children's Emergency Fund (UNICEF) iha Timor-Leste, Valerie Taton, hala´o vizita kortezia ba Xefe Estadu Lú Olo, relasiona ho asuntu Direitu ba Labarik sira. Imajen Mídia Palásiu PR.

DILI (TATOLI)—Reprezentante foun United Nations International Children’s Emergency Fund (UNICEF) iha Timor-Leste, Valerie Taton, hato’o ninian agradesementu ba Prezidente Repúblika tanba Xefe Estadu apoiu ona serbisu UNICEF nian hodi promove labarik sira nia direitu iha Timor-Leste.

UNICEF mós hato’o sira nia satisfasaun ba Xefe Estadu relasiona ho lansamentu Planu Asaun Nasionál ba Direitus Labarik iha Timor-Leste, ne’ebé realiza iha resintu Palásiu Prezidente Nicolau Lobato, 1 fulan Juñu liu ba.

Agradesementu ne’e hato’o bainhira Valerie Taton, hala’o vizita kortezia ba Prezidente  Repúblika Francisco Guterres Lú Olo iha Palásiu Prezidente Nicolau Lobato, Bairru Pité, Dili, segunda ne´e, hodi introduz nia án no aprezenta ninian misaun sira ne’ebé maka sei hala’o iha Timor-Leste kona-ba asuntu direitu labarik.

Iha vizita ne’e, Valerie Taton haklaken katak UNICEF iha nafatin komprimisu oinsá atu defende direitus labarik nian iha Timor-Leste , liu-liu direitu ba sobrevivénsia, direitu ba dezenvolvimentu protesaun no direitu ba partisipasaun.

Xefe Estadu Lú Olo iha okaziaun ne’e hatudu ninian kompromisu atu halo buat hotu nune´e bele defende labarik sira nia direitu iha Timor-Leste no prontu serbisu hamutuk ho UNICEF hodi realiza komprimisu ida ne’e.

Alende ne’e, Lú Olo mós espera apoiu hosi Governu no Parlamentu Nasionál ba asuntu ida ne’e, nune’e bele tulun UNICEF hodi hala’o di’ak liu-tan serbisu ba labarik sira nia direitu iha Timor-Leste.

UNICEF hahú hala’o nia serbisu ba protesaun labarik sira nia direitu iha Timor-Leste dezde tinan 1999 to’o agora, ne’ebé hatudu ona progressu, maibé iha área balu maka tuir UNICEF presiza hadi´a tan hanesan iha área Edukasaun, Saúde no área Nutrisaun. (Jornalista: Xisto Freitas)

 

HUSIK IDA HATÁN